Më 19 tetor policia e Tiranës u përfshi në një tjetër ngjarje të rëndë teksa gjatë shoqërimit, në duart e efektivëve të patrullës së Komisariatit Nr.3 ndërroi jetë 32-vjeçari Lear Kurti.
Hije të forta dyshimi shoqëruan vdekjen e Learit pas shoqërimit të tij në rrugën “Riza Cuka” rreth orës 23:07 të mbrëmjes, me AMP dhe Policinë e Shtetit që u përfshinë në një vorbull deklaratash, në tentativën për të hequr nga vetja përgjegjësinë për ngjarjen.
Kur ka kaluar rreth një muaj nga vdekja e 32-vjeçarit, Prokuroria e Tiranës ka bërë publik raportin e ekspertimit mjeko-ligjor, duke zbuluar se Lear Kurti ka ndërruar jetë nga mbidoza që i ka shkaktuar edhe atak kardiak të menjëhershëm.
Njoftimi:
Prokuroria e Rrethit Gjyqësor Tiranë, ka administruar aktin e ekspertimit mjeko-ligjor nr 494/22 datë 14.11.2022, në lidhje me shkaqet e vdekjes së shtetasit Lear Kurti.
Në përgjigje të aktit të ekspertimit mjeko-ligjor, përcaktohet diagnoza Anatomo-Patologjike:
Mbidozim (Helimim) akut me lëndë narkotike e llojit kokainë. Ishemi akute Hypoksite e miokardit e shoqëruar me kontraktim dhe deformim të miofibrilive, edemë e shprehur e trurit, stazë vazale dhe ekstravazat kapilar, atelektazë dhe emfizemë kompesatore e mushkrisë, hepatit kronik persistent.
Shkaku i vdekjes se shtetasit Lear Kurti ka qenë helmimi (mbidozim) akut me lëndë narkotike të llojit kokainë, i komplikuar me shok toksik, me mekanizimin e ishemisë akute të miokardit që ka sjellë për pasojë asistolinë kardiake (Ndalim i menjëhershëm i zemrës)
