Përplasje janë regjistruar që nisje të seancës së sotme në Kuvend. Ato lindën pas rrëzimit të kërkesës së shtatë deputetëve të opozitës për debat gjatë seancës së sotme lidhur me mandatin e deputetes së PS-së, Olta Xhaçka.
Por përveç debatit midis mazhorancës dhe opozitës, një përplasje është regjistruar edhe midis deputetit demokrat Tritan Shehu dhe Enkelejd Alibeaj.
Shehu e akuzoi Alibeajn se me grupin e tij kanë hequr emrat e deputetëve të PD nga lista e diskutantëve në mocionin e debatit për çështjen e Integrimit Europian.
“Ju e lexoni rregulloren si t’ju vijë për mbarë, e ndryshoni për momentin, hapni arkivat, nxirrni atë që doni. Unë ju kërkoj të mbani baraspeshim dhe të bëni drejtësi se pastaj flasim për integrim dhe BE, si mund të flasim për BE dhe integrim kur demokracia është shkatërruar këtu. Ndodh një gjë e shëmtuar shumë nga të tjerë shëmbëlltyra tuajat, të cilët na heqin ne emrat nga grupi parlamentar i PD-së në këtë diskutim”, tha Shehu.
Ish-ministri i Jashtëm në vijim e cilësoi grupin e Alibeajt një shëmbëlltyrë të mazhorancës së Edi Ramës dhe klonin e tyre, për mënyrën sesi veprojnë kundër interesave të PD.
“Duke marrë shembullin tuaj, duke u bërë kopja juaj, duke u bërë të klonuarit tuaj na e heqin ne emrin në mënyrë të turpshme, në mënyrë të padrejtë. Kam qenë ministër i Jashtëm dhe të mos kem të drejtë të flas për integrimin. Na është hequr e drejta dhe shumë kolegëve të tjerë. Ky është një turp i botës që bëhet nga këta që kujtojnë se drejtojnë një pjesë të njerëzve këtu që kanë marrë me vete figura dhe pozicione absolutisht sureale. Kështu nuk shkohet në integrim duke shkatërruar rregullore, ju në një anë, këta që janë para meje në anën tjetër. Ju i shkelni si parlament, këta këtu shëmbëlltyrat tuaja i shkelin brenda grupit. Kjo tregon se ka një lidhje të madhe të dy palëve”, deklaroi ai.
Vetë Alibeaj iu përgjigj akuzave të Shehut gjatë fjalës së tij duke kërkuar që ai të tërheqë fjalët.
“Këtu nuk bëhet pazar me askënd. Kushdo që përdor fjalët; të shitur te Rama, të lidhur me Ramën, t’i tërheq fjalët se është turp!”, tha Alibeaj.
Edhe deputetja e PD, Ina Zhupa tha se është njoftuar së fundmi se nuk është më pjesë e Grupit Parlamentar të Partisë Demokratike ndërsa akuzoi pjesën tjetër të kolegëve të saj se janë bërë bashkë me mazhorancën që të mos i “lënë të flasin e të bëjnë opozitë”.
“Si qenka kufizuar koha e deputetit? Dyshoj, që këta duan që ta limitojnë që të bëjnë vetë marrëveshjen me mazhorancën. Dhe të mos na lënë të flasim e të bëjmë opozitë. Në momentin që ne kërkojmë fjalën, aq sa të na bjerë…dua ta di në cilin nen më ndalohet të flas për procesin e integrimit. Kush e ka vendosur që opozita të mos flasë? 1 apo 2 minuta, sa të bëjnë?”, tha Zhupa.
Pavarësisht kundërpërgjigjes së Alibeajt edhe deputeti tjetër demokrat Edmond Spaho e akuzoi grupin e tij duke thënë se janë ata bedelat e Edi Ramës dhe rublaxhinjtë.
“Mua s’më përfaqëson as Alibeaj, as Tabaku asnjë tjetër. Unë njoh kushtetuan. Ajo më jep të drejtë mbi bazën e votës. Rregullorja thotë diskutime deri në 10 minuta. Pse s’duhet të flasim? Pse? Se nuk doni ju? Dua të më fusni në listë për çështjen e integrimit, pasi lidhet me shumë gjëra. E di që nuk jam në listë, se ju jeni bedelat e atij që vjen të karrigia e atij. Ju jeni rublaxhintë e atij, ju jeni bedelat e atij që i mbaron me Iç emri. Kur ne kërkojmë të drejtën e fjalës, kërceni si miza e kalit, sikur e ka pickuar miza. Sikurse jeni ju, janë dhe disa të tjerë nga krahu jonë, që bëni të njehen lojë dhe jeni turpi i qytetarëve shqiptarë, e keni përdhosur këtë parlament”, tha Spaho.
