Më 11 nëntor në media u “shit” si një megaoperacion policor zbulimi i një sere prej 2 hektarësh në fshatin Rërëz të Beratit.
Sera ishte përshtatur me krevat dhe dushe ku rreth 95 gra e vajza nga Tirana dhe qytezat rreth saj ishin stacionuar prej më shumë se 20 ditësh, duke punuar në pastrimin dhe paketimin e kanabisit.
Gratë nga Tirana e Fushë-Kruja deklaruan gjatë marrjes në pyetje se ishin mashtruar nga grupi kriminal, që u kishin thënë se do të vilnin ullinj. Ato madje pretenduan se ishin kërcënuar se do i vrisnin familjarët dhe në krye të tyre për t’i ruajtur ishin Drita dhe Izmira Mema, 2 gra që janë në burg si organizatore të rrjetit.
Me 5 mijë lekë pagesë ditore për punën me kanabisit, gratë e kërcënuara nga 16 në 65 vjeçe kishin zgjedhur të heshtnin.
Kjo tregon për një aktivitet kriminal në shkallë organizate, pasi sera e Kutallisë mbrohej edhe nga 9 roje me armë në duar.
Por aktiviteti kryhej në ditën për diell, mes serave të tjera të fermerëve që kultivojnë domate e luleshtrydhe, teksa furgonët e bandës së ngarkuar me arka me kanabis hynin dhe dilnin nga fshati të pa shqetësuar.
Për të shitur si sukses zbulimin e serës doli në konferencë për mediat vetë drejtori i Policisë Kriminale në Policinë e Shtetit, Neritan Nallbati.
Por operacioni që nisi me mbi 100 të shoqëruar u shfry më shpejt seç pritej, teksa 95 gratë e shoqëruara u liruan në mbrëmje dhe të nesërmen në gjyq dolën vetëm 11 persona.
Gjykata la në burg për këtë aktivitet kriminal ku plot 800 kg kanabis u gjetën të gatshme për të dalë në treg dhe mbi 700 arka të tjera në përgatitje e sipër, pronarin e tokës së lënë me qira Hamdi (Xhimi Dyli), nënë e bijë Drita dhe Izmira Mema që mbikëyqrnin punëtoret dhe rojet e armatosur Jurgen Ujkaj, Bashkim Mema, Sidrit Bisha, Endrit Xheka, Edison Mema, Mirvaldo Disha, Blerim Xheka dhe Samuel Lushaj.
Asnjë gjurmë nga “bosët” e krimit që i dhanë jetë këtij aktiviteti kriminal në zemër të një nga zonave bujqësore që njihet si “hambari” i Beratit dhe ku vetë kryeministri Edi Rama ka shkuar të lëvdojë punën e fermerëve dhe pikave grumbulluese.
Edhe pse duket realisht e pamundur që aktiviteti i paligjshëm të jetë zhvilluar pa “bekimin” e uniformave blu pasi punishtja ishte ngritur në një zonë lehtësisht të aksesueshme dhe shumë pranë aksit nacional Fier–Berat, krerët e Policisë në Tiranë dhe gjykata duket se zbatuan paktin e heshtur për të “mbyllur” operacionin me 11 të arrestuarit.
Pavarësisht kësaj, dyshimet e opinionit publik për seriozitetin e punës së Policisë së Shtetit duket se kanë vendosur me shpatulla pas muri AMP e Ardi Veliut.
Agjencia raportohet se ka nisur hetime për serën me kanabis, pasi ka dyshime të forta mbi Drejtorinë e Policisë në Berat se elementë të caktuar kanë qenë në dijeni të aktivitetit kriminal.
Në sajë të këtyre hetimeve, pritet që në pyetje të merret zinxhiri komandues i policisë së Beratit, si dhe specialistët e policëve të zonës ku ndodheshin serat.
Agjentët e AMP do të marrin në pyetje efektivë të policisë duke mos përjashtuar as drejtorin e policisë së qarkut Berat, Edmond Tarkaj.
