Afera e portit të Durrësit ka qenë kryefjala e mbledhjes së Grupit Parlamentar të Partisë Demokratike, me kreun e saj Sali Berisha që ka zbuluar strategjinë me të cilën opozita “do t’i dalë për Zot” mbrojtjes së pronës publike, e cila sipas tij do të plaçkitet me projektin Rama-Alabbar.
“Nuk ka njohur toka një vjedhje si kjo. Ndërtohet për pasunarët dhe qeveritarët Marina Bay, paguajnë shqiptarët sikur të jenë skllevër rreth 2 miliardë për portin tjetër. Kurse Rama, Olsi dhe Karriçët e tyre, sipas asaj që kanë shkruar aty, 60 përqind, se e kanë sekret, 60-përqindëshi nuk mund të jetë kush tjetër përveç Edi Ramës, Olsi Ramës, Bledi Çuçit dhe klanit qeveritar të drogës. Nuk mund të jetë kush tjetër”, tha Berisha.
Berisha paralajmëroi se shumë shpejt do të nisin protestat për të mbrojtur një nga pasuritë më të mëdha publike të Shqipërisë, e për më tepër do të kërkohet nga PD ngritja e një komisioni hetimor për marrëveshjen e firmosur nga Ministria e Infrastrukturës dhe Energjisë.
“Meqenëse Edi Rama po vepron në mënyrë të rrufeshme për kalimin e ligjit për këtë marrëveshje, atëherë edhe ne në mënyrë të rrufeshme të krijojmë komision hetimor parlamentar dhe ta dërgojmë edhe këtë në Gjykatë Kushtetuese. Duhet të parashikojmë edhe tjetër armë që kemi në dorë, protestat e fuqishme kundër kësaj grabitje të tmerrshme”, deklaroi ai.
Më tej ish-kryeministri nënvizoi se “Shqipëria nuk ka regjistruar një plaçkitje të tillë të një prone publike, vlera e të cilës është të paktën 3 miliardë euro”.
Sipas Berishës, kryeministri Rama ka hartuar në mënyrë të detajuar projektin që ai personalisht të përvetësojë 1 milion metër katror truall.
“Kur konstaton se, me një ligj super urgjence, vidhen dy buxhete, kemi të bëjmë në total me shumë miliardë plaçkitje dhe grabitje, kemi të bëjmë me grabitje, vjedhje nga Edi Rama dhe enturazhi i tij më të madhen e këtij vendi të pronës publike. E tërë historia e Shqipërisë nuk ka regjistruar një plaçkitje të tillë të një prone publike, vlera e të cilës është të paktën 3 miliardë euro”, nënvizoi kreu i PD.
