Kandidatët e opozitës për primaret janë të gjithë të pastër dhe pa cen. Garancia vjen nga deputeti demokrat Luan Baçi, i cili tha në studion e Debatit në A2 CNN se kandidaturat kaluan në filtrin e anëtarësisë dhe nuk ka pasur skualifikime.
“Kandidaturat që kanë dalë janë të mrekullueshme, pa asnjë problem, të pa përfolura, kanë kaluar në filtrin e anëtarësisë. Çdo kandidaturë e PD duhet të jetë pa një cen, duhet të jetë një figurë e pastër. Të gjitha kandidaturat sot kanë kaluar emër për emër dhe është lexuar edhe formulari i dekriminalizimit. Jam garant që këta kandidatë janë të pastër”.
Deklaratave të analistëve në studio se mbledhja e kryesisë së PD-së u shty për shkak të mos dakordësisë, Baçi iu përgjigj se e vetmja arsye është mungesa e dokumentacionit të kandidatëve për ato bashki.
“Janë mbi 3 kandidatura për çdo bashki dhe emrat do ishin miratuar që sot, por nëse do ishte plotësuar dokumentacioni i çdo kandidati. Është vetëm çështje teknike. Mungesa e dosjeve e dokumentacionit në dosje nuk mund të merren në analizë kandidatët e asaj bashkie. Kjo ka qenë arsyeja që mbledhja u shty”.
Ndërkohë konkurrencën reale për Tiranën, analistët Sami Neza dhe Ilir Kalemaj e shohin te kandidaturat e shpallura të para në primare që janë Belind Këlliçi, Gert Bogdani dhe Ilir Alimehmeti.
