Përfshirja e nënkryetarit të Partisë Demokratike në zgjedhjet lokale të 14 Majit si kandidati i opozitës përballë socialistëve për bashkinë e Elbasanit, do të krijojë vakancën e radhës në selinë blu.
Boçi pritet të dorëzojë mandatin e deputetit dhe do të jetë me shumë gjasë kandidati i parë që konfirmohet nga radhët e opozitës me konsensus të plotë, pasi në Primare nuk pritet të ketë kandidatura të tjera përveç tij.
Me futjen e Boçit në garë, emri që do ta zëvendësojë në Kuvend nga lista e kandidatëve për deputetët në zgjedhjet e 25 prillit për qarkun e Elbasanit është Qani Xhafa.
Këtë e bëri të ditur vetë nënkryetari i PD gjatë konferencës për mediat ku sqaroi se Xhafa është një emër i respektuar në zonën e Elbasanit.
“Personi që më zëvendëson është z.Qani Xhafa, ish-drejtues i komunës Labinot Mal, një nga njerëzit më me reputacion në zonë, me influencë, jo më kot ka marrë një numër shumë të madh votash. Një njeri që përgjatë kohës kur ka drejtuar komunën ka dhënë rezultate, të cilat banorët i vlerësojnë dhe prandaj e respektojnë. Një njeri që ka mendimin e tij të pavarur dhe nuk është se ka një përcaktimi rigid në pozicionimin e tij. Pozicionimi i tij ka qenë gjithmonë në shërbim të qytetarit, në shërbim të votuesit. Këto janë thjesht qëndrime sipas opinioneve. Më pas pozicionimin e tij do e artikulojë vetë në momentin që do marrë mandatin”, tha Boçi gjatë konferencës për shtyp.
Sakaq, vlen të kujtojmë se Boçi ishte deputeti më i votuar në qarkun e Elbasanit dhe arriti të thyejë herësin me mbi 9000 vota, teksa renditej i shtati në listë.
