2 të rinj janë arrestuar nga policia e Sarandës pasi kanë tentuar të trafikojnë drogë drejt Korfuzit.
Në pranga përfunduan shtetasit me iniciale A.D, 19 vjeç dhe F. S., 16 vjeç, të dy banues në fshatin Shëndëlli, të cilëve iu sekuestrua 2.7 kg kanabis.
“Sarandë/Shërbimet e Seksionit për Hetimin e Krimeve në Komisariatin e Policisë Sarandë, mbështetur dhe nga inteligjenca informative se 2 shtetas po tentonin të trafikonin lëndë narkotike në drejtim të Korfuzit, organizuan dhe finalizuan operacionin policor të koduar “Krane”, si rezultat i të cilit u bë arrestimi në flagrancë i shtetasve:
-A. D., 19 vjeç dhe F. S., 16 vjeç, të dy banues në fshatin Shëndëlli, Sarandë.
Pas lokalizimit të automjetit me drejtues shtetasin A. D. dhe pasagjer shtetasin F. S., në vendin e quajtur “Ura e Kdanenë”, shërbimet e Policisë kanë ushtruar kontroll dhe në pjesën e pasme të automjetit kanë gjetur 2. 7 kg lëndë të dyshuar narkotike cannabis sativa, të ndarë në 3 pako të mbështjella me natriban”, njofton policia.
Materialet procedurale në ngarkim të dy shtetasve të arrestuar për trafik droge i kaluan Prokurorisë për veprime të mëtejshme.
