Kryeministri Edi Rama në intervistën për SkyNews lidhur me problemin e krijuar në Britaninë e Madhe me 12 mijë azilkërkuesit nga Shqipëria që kanë zbarkuar në ishull me gomone, është përpjekur t’i devijojë pyetjeve që e vendosin para përgjegjësisë.
Teksa gazetarja Siobhan Robbins i kujtoi “pushtimin” të cilit iu referuar si term Sekretarja e Brendshme britanike, Suella Braverman kur foli në Westminster për numrin e lartë të azilkërkuesve, Rama tentoi t’i shmangej thelbit duke iu futur retorikës politike.
Për kryeministrin adresimi i largimit të shqiptarëve nga vendlindja që adresohet nga Mbretëria e Bashkuar nuk do të thotë asgjë, pasi ai kërkon një falje publike nga ministrja Braverman vetëm për retorikën “kriminale” që sipas Ramës është përdorur në Londër.
“Nuk kam dëgjuar kurrë një falje, gjë që më bën të mendoj se në vend të shprehjes së ekzagjeruar të zhgënjimit, ky ishte një sulm i llogaritur”, tha Rama për SkyNews.
Por gazetarja Robbins nuk ra pre e dëshirës për protagonizëm të Ramës dhe e pyeti sërish kryeministrin, duke iu referuar 10 viteve të tij në pushtet lidhur me përgjegjësinë që ai ndjen si ligjvënësi i parë i Shqipërisë, për largimin e mijëra të rinjve.
Përgjigja e Ramës ishte sërish shmangëse, sa e ftohtë aq dhe ironike: “Ne e dimë gjithashtu se çfarëdo që të bëjmë, Shqipëria nuk do të jetë Londër, nuk do të jetë Paris e nuk do të jetë Berlin”.
“Por duke qenë kryeministër që nga viti 2013, pyesja veten se sa përgjegjësi ndjente për ndjenjat e mungesës së shpresës që po i shtyjnë njerëzit të ikin jashtë”, konstaton gazetarja.
Dhe përgjigja e Ramës ishte e tillë: “Është e vërtetë që ju mund të dëgjoni njerëzit që thonë kështu dhe është gjithashtu e vërtetë që tani është një periudhë kohore kur ka shumë ndikim të keq në përgjithësi në botë për shkak të luftës, për shkak të krizës [pas] pandemisë“.
“Menjëherë është një situatë tjetër, sepse e mira sepse, sepse, sepse… Ne e dimë se çfarë duhet të bëjmë. Duhet të bëjmë gjithçka për të përmirësuar situatën këtu dhe për ta bërë atë gjithnjë e më të mirë për të gjithë”, shtoi kryeministri.
