Ditën e djeshme (08.11.2022), një aksident ndodhi në një gurore në fshatin Vodicë, ku mbeti i plagosur një punëtor.
Ndërkohë policia ka njoftuiar mëngjesin e kësaj të Mërkure se është proceduar penalisht për veprën penale “Shkelja e rregullave të mbrojtjes në punë”, administratori i gurores.
“Specialistët për Hetimin e Krimeve të Komisariatit të Policisë Kolonjë, në vijim të veprimeve procedurale të kryera në lidhje me ngjarjen e ndodhur ditën e djeshme, në një gurore, në të cilën gjatë punës u aksidentua një punëtor, referuan materialet në Prokurori dhe filloi procedimi penal në gjendje të lirë për shtetasin V. D., 58 vjeç, banues në Ersekë, Kolonjë, me detyrë administrator i gurores. Procedimi penal ndaj këtij shtetasi filloi pasi në guroren e kompanisë që ai administron, në afërsi të fshatit Selenicë, Kolonjë, shtetasi R. D., 43 vjeç, banues në Ersekë (punëtor), duke punuar me një makineri, ka mbetur i bllokuar dhe për pasojë ka marrë dëmtime në trup”, njofton policia.
Aktualisht 43-vjeçari ndodhet në Spitalin e Traumës, në Tiranë, jashtë rrezikut për jetën.
Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme.
