Kombëtarja shqiptare është mundur me shifrat 1-0 në miqësoren e luajtur sot kundër Katarit në Marbeja të Spanjës, me një ekip eksperimental të formuar thuajse plotësisht nga futbollistë të cilët militojnë në Kategorinë Superiore.
Kuqezinjtë do të ndëshkoheshin në minutën e 37-të. Pas një penalltie të dhënë për Katarin, Albeoz Ali tregohet i saktë nga pika e bardhë, duke mposhtur portierin Dajsinani, i cili hidhet në krahun e kundërt.
Pjesën e dytë Shqipëria e nisi në sulm dhe ishte pranë golit të barazimit me Herald Marku, që provoi nga distanca, por goditja e mesfushorit të Vllaznisë përfundoi ngjitur me shtyllën. Më pas ishte Turkaj që do t’i afrohej. Kuqezinjtë pretendojnë edhe për penallti, teksa pas protestave, trajneri Reja ndëshkohet me karton të verdhë. Kombëtarja shqiptare tentoi deri në fund të shmangte humbjen, por nuk ia doli dot.
Trajneri Reja kishte zgjedhur që të bënte disa ndryshime në krahasim me ndeshjen ndaj Arabisë Saudite , pasi në formacionin titullar “mbijetuan” vetëm Gurishta, Turkaj dhe Hadroj. Dajsinani, Ujka dhe Cara që nuk ishin në ndeshjen e dy javëve më parë ishin titullarë, ashtu si edhe Abazaj, i vetmi “legjionar” i mirëfilltë në radhët e përfaqësueses.
