Pas një vere plot lëvizje, Partizani ishte gati për nisjen e sezonit dhe këtë e tregoi duke marrë tri fitore radhazi, që e konfirmuan menjëherë si pretendenti i madh për titullin kampion. Por me kalimin e javëve, skuadra e Kolelës nisi të dukej më normale dhe të linte pikë javë pas jave.
Kanë 19 pikë të grumbulluara në 11 javë, por në 8 përballjet e fundit “kanë vjelë” vetëm 10 pikë. Humbën derbin me Tiranën dhe së fundmi lëshuan edhe kreun ndaj rivalëve më të mëdhenj në këtë sezon dhe në historinë e klubit.
DËMTIMET – Megjithëse trajneri Kolela nuk është ankuar asnjëherë, dëmtimet janë një nga problemet e mëdha të Partizanit në këtë sezon. Aktualisht në infermieri janë Da Silva dhe Matondo, dy titullarë absolutë, por në të shkuarën lista ka qenë “çarçaf”.
STOLI JOEFEKTIV – Kur ke shumë dëmtime, plani rezervë padyshim janë lojtarët e stolit, por këta të fundit nuk e kanë ndihmuar sa duhet Partizanin, të paktën për sa i përket sulmit.
“Demat” kanë shënuar 12 gola në Kategorinë Superiore në këtë sezon dhe asnjë prej këtyre rrjetave nuk është realizuar nga lojtarët, që janë aktivizuar nga stoli. Tashmë Kolela e ka një 11-she fikse, ndërkohë që stoli është mjaft i bollshëm, por duket se nuk është në nivelin që të bëjë diferencën.
Asnjëri prej emrave si Cvetanoski, Dragaj, Hodo, Mensah, Zekolli apo Telushi e Romero, nuk kanë mundur të ndryshojnë rrjedhën e asnjë ndeshjeje. Ndërkohë, edhe kur janë aktivizuar si titullarë, këta lojtarë nuk kanë arritur të shënojnë. Kështu, stoli thuajse u ribë i tëri në këtë sezon, por sërish nuk po jep përgjigjet e duhura.
KRAHASIMI – Mirëpo edhe titullarët e “demave” duhet të kishin shënuar më shumë, pasi nuk kanë asnjë përmirësim nga Partizani i vjetshëm. Skuadra e Ilir Dajës shënonte 12 gola vjet në 11 javë, sa kanë shënuar edhe në këtë edicion.
Madje, vjet Partizani kishte pësuar 10 gola, 1 më pak se sivjet, duke pasur golavarazh më të mirë. Megjithatë, numëronte 4 pikë më pak pas 11 përballjeve. Nëse krahasimi para pak javëve bëhej me Partizanin e sezonit 2018-‘19, tani bëhet me atë të vjetshmin, që bëri një nisje shumë të ngadaltë.
/Panoramasport
