Kryeministri i Kosovës, Albin Kurti ka pritur në takim mëngjesin e sotëm, liderët e partive opozitare për të diskutuar në lidhje me situatën në veri.
Takimi po mbahet në ndërtesën e qeverisë së Kosovës dhe pjesëmarrës ishin Kryetari i Partisë Demokratike, Memli Krasniqi, ai i Lidhjes Demokratike të Kosovës, Lumir Abdixhikum, Veton Surroi dhe kryetari i Aleancës për Ardhmërinë e Kosovës, Ramush Haradinaj.
Kryetari i Aleancës për Ardhmërinë e Kosovës, Ramush Haradinaj ka reaguar pas takimit që pati me Albin Kurtin.
Në një postim në Facebook, Haradinaj u shpreh se u detyrua të linte takimin, pasi sipas tij, Kurti mbante ligjërim dhe nuk dha sqarim për mos pranimin e kërkesës së bërë nga SHBA-të për targat.
“Edhe pse isha pjesë e takimit me kryeministrin Kurti, u detyrova ta lëshoj takimin sepse Kurti mbante ligjërata e nuk na sqaronte se përse ka prishur raportet me Amerikën dhe përse nuk po kthehej që të realizojë kërkesën e tyre. Për mua është e papranueshme që në raste kaq të ndjeshme, të prishim raportet me aleatin kryesor të sigurisë”, shkroi Haradinaj në Facebook.
