Çmimi i karburanteve në vend ka qenë një nga temat e nxehta që është prekur në bashkëbisedimin virtual të kreut të PD, Sali Berisha me qytetarët.
I pyetur lidhur me vendimet e çuditshme të Bordit të Transparencës, Berisha akuzoi qeverinë dhe kryeministrin Rama se po kryejnë kontrabandë me naftën.
Duke u zotuar se do të përgjysmojë taksën e karburantit sapo PD të vijë në pushtet, Berisha tha se “rreth 250 mijë ton naftë po futet kontrabandë qeveritare e importuar nga Libia dhe burime të tjera”.
“Dy janë shkaqet më themelore korrupsioni i tmerrshëm e kontrabanda që bën Rama e qeveria e tij me naftën, tani është dokumentuar se konsumi i naftës sot në Shqipëri është rreth 250 mijë ton më pak se sa ishte në 2012. Ndërkohë që automjetet në Shqipëri nga 430 mijë që ishin në 2012 janë 740 mijë. Çfarë ndodh me naftën? Nafta rreth 250 mijë ton futet kontrabandë qeveritare e importuar nga Libia dhe burime të tjera. Rama ka tatuar naftën me të njëjtin çmim si taksë me çmimin që ajo shitet në stacionet e pompave në Uashington, në Toronto, 1.2 euro është taksa mbi naftën. PD zotohet të përgjysmojë taksën mbi naftën, të luftojë me zero tolerancë kontrabandën qeveritare me naftën. Me këto ndërhyrje nafta do zbresë në çmimet më të arsyeshme e më të ulëta në rajon”, tha Berisha.
