Policia e Vlorës ka arrestuar shtetasin A.N. 23 vjeç me banim në Durrës, i pesti i prangosur në kuadër të fazës së tretë të operacionit “Piqeras”.
Gjatë dy fazave të para të operacionit janë arrestuar 4 shtetas të tjerë që ishin të përfshirë në dhënien e ndihmës për kalimin e paligjshëm të emigrantëve drejt vëndeve të BE, kundrejt fitimit monetar.
“Në vijim të operacionit policor të koduar “Piqeras”, për goditjen e aktivitetit kriminal të dhënies ndihmë shtetasve të huaj, kundrejt fitimit, për kalim të paligjshëm të kufirit, nga specialistët e Seksionit për Hetimin e Trafiqeve të Paligjshme dhe Narkotikëve u bë kapja dhe ndalimi i shtetasit A. N., 23 vjeç, banues në Durrës.
Nga hetimet dyshohet se ky shtetas ka bashkëpunuar me shtetasit P. N. (vëllai i tij), N. N., R. R. dhe K. Sh, të arrestuar më parë, gjatë dy fazave të operacionit policor të koduar “Piqeras”, për sigurimin e transportimit të emigrantëve, kundrejt fitimit, drejt Shkodrës, me qëllim kalimin në Malin e Zi, me destinacion përfundimtar vendet e BE-së.”– njofton policia.
Vijon puna për identifikimin dhe kapjen e personave të tjerë të implikuar në këtë veprimtari kriminale.
Materialet i kaluan Prokurorisë pranë Gjykatës së Shkallës së Parë Vlorë, për veprën penale “Ndihma për kalim të paligjshëm të kufijve”, kryer në bashkëpunim.
