Aktorja dhe aktivistja Kaltrinë Zeneli zbulon se është kërcënuar pasi publikoi videon ku shihej se një infermiere godiste një grua në shtëpinë e të moshuarve “Orenda” në Pejë.
“Veç mos të pafsha në rrugë se kam me t’mbyt”, ka qenë një nga mesazhet kërcënuese, për të cilin Zeneli tregoi në një emision në KTV.
E moshuara dyshohet se dhunohej prej kohësh nga punonjëset e një qendre azili pleqsh në qytetin e Pejës në Kosovë, por rasti i rëndë u bë publik vetëm pas publikimit të videos në rrjetet sociale.
Në video shfaqet njëra prej punonjëseve që godet me shpulla të moshuarën, ndërsa koleget e saj qeshin në sfond.
E moshuara është e ëma e Taulant Nurës, i rënë dëshmor në luftën për çlirimin e Kosovës.
Të afërmit e viktimës e kanë nxjerrë menjëherë nga azili privat, ku siç deklaruan paguanin 650 euro. Ata thanë se ajo nuk e kishte treguar dhunën pasi vuante nga alzhaimeri.
