Mjeku i njohur epidemiolog Ilir Alimehmeti në një konferencë për mediat ka konfirmuar se do të hyjë në garën e “Primareve” në Partinë Demokratike për të kërkuar besimin e demokratëve si kandidat për Bashkinë e Tiranës.
Në fjalën e tij, Alimehmeti theksoi se hyn në garën për bashkinë e kryeqytetit, pasi “Tirana jonë është e sëmurë dhe i ka të gjitha mundësitë të shërohet”.
“Sot, në shërbim të komunitetit, unë kandidoj në zgjedhjet primare për Bashkinë e Tiranës pranë Partisë Demokratike të Shqipërisë, me besimin e plotë se procesi i Primareve do të jetë plotësisht transparent, i besueshëm dhe shpresëndjellës. Pranë Partisë Demokratike të Shqipërisë gjej njerëz, profesionistë dhe personalitete, që ndajnë të njëjtat shqetësime, kanë të njëjtën ndërgjegje qytetare, kanë të njëjtat vlera, dhe kanë të njëjtin besim se vetëm puna, mundi dhe djersa e pashtershme mundet ta shërojë Tiranën tonë dhe të çojë përpara zhvillimin e qëndrueshëm dhe të përgjegjshëm të Tiranës sonë. Ky ekip nuk është hermetikisht i mbyllur. Ai është një ekip i hapur dhe do të pasurohet me figura dhe profesionistë të tjerë me vlera të pamohueshme si nga forcat aleate, si nga shoqëria civile, pasi Tirana është e jona, është e të gjithëve ne!”, tha ai.
Mjeku i njohur e mbylli deklaratën duke u bërë thirrje gjithashtu qytetarëve që t’i bashkohen masivisht protestës së thirrur nga kryedemokrati Sali Berisha në 12 nëntor.
“Dua të bëj një thirrje patjetër të marrim pjesë masivisht në protestën kombëtare të datës 12 nëntor 2022 pikërisht në Tiranën tonë, për të filluar çrrënjosjen e të keqes që ka pllakosur në çdo prag”, deklaroi ai.
Alimehmeti bëhet kështu zyrtarisht kandidati i tretë pas Belind Këlliçit dhe Gert Bogdanin që hyn në garën e brendshme të selisë blu për Tiranën.
