Mjeku Ilir Alimehmeti deklaroi se pati një frymë dhe shtysë nga ana e qytetarëve, që ai të kandidojë për Bashkinë e Tiranës.
Në emisionin “Now” në Euronews Albania, Alimehmeti u shpreh se ndjen dhimbje për Tiranën, për mënyrën se si është abuzuar me kryeqytetin.
“Sa kohë u desh të vinte ndjenja, sepse në fund, unë nuk besoj se jam i vetmi që kam këtë ndjenjë, një ndjenjë e fortë dhimbjeje për Tiranën, për komunitetin, për atë që po humbim përditë. Po ta kthesh në një dhmnbshuri konstruktive për të ngritur diçka më tej, kjo mund të bëhet. Këtu pati edhe një ngritje vale, kërkese, shtyse, nga shoqëri civile, nga persona të ndryshëm. Ju e patë se si u prit 1 muaj më parë, disa lajme që përhapen portalet e bashkisë dhe kjo ngriti frymë dhe pritshmëri në njerëz”, theksoi ai.
I pyetur ne lidhje me kullat e ndërtuara në kryeqytet tha se kushdo që të jetë kryetar bashkie duhet t’i hapë derën një kompanie auditimi për të kuptuar nëse ndërtimet kanë qenë apo jo legjitime.
“Ka një migrim të brendshëm tranzitor përsa kohë njerëzit qëndrojnë në Tiranë e më pas largohen nga Tirana. Ka shumë gjëra që mund të zhbëhen. Që ditën e parë në mënyrë absolute, unë mendoj se çdokush që duhet të shkojë aty të jetë kryetar i Bashkisë së Tiranës duhet t’i hapë derën një kompanie auditimi për të kuptuar nëse ka qenë një rrugë legjitime ngritja e atyre kullave. Kjo është gjëja e parë që do të bëja. Kompanisë audituese duhet me ia hapur derën. Lëri organet të bëjnë punën siç duhet”, tha ai.
Alimehmeti shpalli kandidaturën për Primaret për Bashkinë Tiranë, këtë të mërkurë. Nga selia blu, ai prezantoi zyrtarisht kandidaturën e tij për të marrë pjesë në Primaret e PD.
