Seanca e efektivit Ludjan Zaimi, i akuzuar për vrasjen e kolegut te tij Caush Saliasi, në ambientet e komisariatit Nr.3 nuk është zhvilluar.
Shkak i shtyrjes së seancës u bë gjendja shëndetësore e të pandehurit, pasi ai nuk u paraqit. Ndërsa seanca e radhës u caktua më 14 nëntor.
Mbrojtja ka paraqitur edhe argumenta sa i përket trajtimit të klientit të tyre me medikamente pasi vuante nga çrregullime të shëndetit mendor, gjë e cila është provuar pjesërisht edhe nga ekspertiza që i është bërë Zaimit.
Ish-efektivi vrau kolegun e tij në ambientet e komisariatit numër 3 në Tiranë. Çaush Saliasi humbi jetën në Spitalin e Traumës si pasojë e plagëve të rënda në organet jetësore.
Ndërkohë që autori, është shprehur se shkak për sherrin ishte bërë tallja dhe bullizimi nga kolegu i tij, Saliasi.
Kur këta të dy ishin me shërbim, bënin shaka me njëri tjetrin por gjithçka ka marrë një rrjedhë ndryshe dhe gjërat janë kthyer në personale.
Pas sherrit, mësohet se Ludjan Zaimi i ka shkuar pranë Çaushit duke e pyetur “Si do e lëmë bashkë?”.
Pasi ka hyrë në komisariat, mësohet se autori 25-vjeçar, u është drejtuar edhe policëve të tjerë të sallë duke thënë “Ulni kokat ju” dhe më pas ka shkrepur armën drejt 55-vjeçarit.
