Nga BoldNews.al
Saranda është një nga qytetet më të frekuentuara gjatë stinës së verës, ku banorët por edhe pushuesit vuajnë për pikën e ujit. Furnizimi me ujë bëhet me orare, megjithëse burimi i “Syrit të Kaltër” dhe më pas Bistrica, kanë ujë të pijshëm me bollëk.
Me investime minimale do të mundësohej edhe uji i pijshëm, i kërkuar me aq ngulm nga Italia. Por, politikanët lokalë dhe qendrorë kanë menduar vetëm për “xhepat” dhe “kujtohen” sa herë ka zgjedhje.
Zgjedhjet e ardhshme u caktuan në 14 maj 2023, ndërkohë që kryetari i Bashkisë së Sarandës, Adrian Gurma, është në dyshim. Por, kjo s’e ka penguar që t’u hedhë hi syve sarandjotëve, pasi në kohën kur vëmendja e të gjithëve është te ndarja e parcelave të plazhit, ai bën tendera luksi.
Sipas dokumenteve që disponon BoldNews.al, Adrian Gurma ka urdhëruar hapjen e një tenderi për zbukurimin e qytetit. Në pritje të ndonjë vizite të mundshme të Ramës, i cili ka filluar që tani fushatën, Gurma po mendon më shumë për makijazhin sesa për punët çorap që ka bërë në qytet, i cili dita-ditës po humb shkëlqimin e dikurshëm.
Madje, keqqeverisja ka sjellë kaos edhe në Ksamil, Butrint apo në zonat e tjera. Por, Gurma në vend që të ndreqë këto gabime, e ka mendjen tek fishekzjarrët dhe topat e borës për zbukurimin e pemës së Vitit të Ri.
Ai ka hapur tenderin me objekt “blerje materiale dekori, rinovim në dekorin e qytetit” me një fond 1.666.667 lekë pa TVSH. Ose me TVSH, shuma shkon në rreth 20 milionë lekë të vjetra. Në dokumente thuhet se kohëzgjatja e kontratës ose afati për zbatimin është vetëm 7 ditë nga lidhja e kontratës, teksa tenderi do të bëhet në datën 10 nëntor 2022.
Parashikohet që në datën 20 nëntor zbukurimet të jenë vendosur, teksa Gurma duket se do t’u heqë mendjen sarandjotëve nga hallet dhe problemet e përditshme.
Në dokumentet shoqëruese, Bashkia e Sarandës shkruan se kërkon të blejë një mori zbukurimesh për festat e fundvitit. Kërkon të blejë tuba ndriçimi të verdhë, flamuj kombëtar të përmasave normale, flamuj me logo Bashkia Sarandë. Gjithashtu edhe zbukurime për pemën qendrore të Vitit të Ri, fiongo, globa, etj.
Në specifikime, Bashkia e Sarandës kërkon edhe katrama në formë tjegulle për mbulim shtëpize dekorative druri, lidhëz druri këndore ngjyrë floriri, konstruksion metalik spesor etj, etj.
