45-vjeçari shqiptar Spartak Dyrmishi, i cili akuzohet për përdhunimin e një gruaje dhe tentoi të abuzonte me një tjetër, ka dhënë dëshminë e tij para se të dërgohej në gjykatë.
Ai ka pranuar akuzat që rëndojnë mbi të, ndërsa është shfajësuar duke thënë se ishte nën ndikimin e drogës dhe alkolit.
“Droga dhe alkooli më kanë shkatërruar jetën. Isha nën ndikim kur ndodhi ajo për të cilën ankohen dy vajzat, gjë që e konfirmoj”, mësohet se u ka thënë ai policëve të Sigurimit të Athinës që po trajtojnë rastin, raportojnë mediat greke.
Mbrëmjen e djeshme policia shqiptare ka arrestuar shtetasin Spartak Dyrmishi i shpallur në kërkim nga autoritetet greke për shkak se dyshohet për disa përdhunime në shtetin fqinj.
Uniformat blu organizuan strukturat operacionale për të ushtruar kontrolle të imtësishme në qytetin e Vlorës duke bërë të mundur ndalimin e këtij shtetasi.
Duke qenë se Dyrmishi ka shprehur dëshirën e tij për t’u dorëzuar te Policia greke, në orët e para të mëngjesit të sotëm, Policia shqiptare e ka dorëzuar atë në Pikën e Kalimit Kufitar Kakavije.
