Reali i Madridit është ndalur nga Girona në një barazim 1-1. Girona ka marrë një pikë plot meritë, pasi e ka kërkuar atë deri në minutën e fundit, duke luajtur mire përballë Realit.
Por mënyra se si erdhi goli i barazimit nga katalanasit ka tërbuar madrilenët. Një penallti e shumëdiskutuar 10 minuta para fundit i ka dhënë mundësi Stuanit të barazojë golin e Viniciusit për Realin dhjetë minuta para tij.
Edhe trajneri Karlo Ançeloti këtë herë ka humbur qetësinë që e karakterizon, duke deklaruar se gjyqtari Melero dhe VAR-i kanë shpikur një penalti për t’i dhuruar pikën Gironës.
Në Madrid bien dakord se takimi u mbyll me meritë siç duhej mbyllur, në barazim, por jo që barazimin ta firmosnin gjyqtari në fushë dhe regjia në VAR.
Për t’i vënë kapakun, kartoni i kuq i Toni Krosit! Me 10 lojtarë në fushë Reali provoi deri në fund, por pa sukses.
“Nuk më pëlqen të flas për gjyqtarët, por diçka do ta them. Rasti i penalltisë ishte flagrant, nuk mund të jepej ajo penallti sepse nuk kishte prekje të topit me dorë.
Dora e majtë e Asensios ishte në një pozicion jonatyral, por ai nuk e preku fare topin. Mendoj se e shpikën atë penallti. Sa për golin e anuluar të Rodrigos, rregulli është i qartë.
Ajo që nuk arrij ta kapërdij është penalltia, sepse erdhi në një moment kyç të takimit dhe na kushtoi fitoren. Falë asaj penalltie të paqenë kemi dy pikë më pak në renditje”, tha i revoltuar pas ndeshjes, Karlo Ançeloti.
