Në selinë e Partisë Demokratike është duke u zhvilluar mbledhja e Grupit Parlamentar që u thirr nga kreu i selisë blu, Sali Berisha.
Deputetët demokratë janë njohur me projektligjin për parashkrimin e veprave penale të korrupsionit dhe krimin e organizuar, me Berishën që u kërkoi ta miratonin dhe shpjegoi se kategoritë që do të preken janë kryeministri, zv.kryeministri, ministrat, kryetari i Kuvendit, kryetari i Bashkisë së Tiranës dhe ish-funksionarët në këto pozicione.
Ndërkohë, ajo çka ra në sy në nisje të kësaj mbledhje ishte bashkimi me Berishën i dy deputetëve që deri më sot janë rreshtuar ose në krah të grupit të Enkelejd Alibeaj, ose kanë qëndruar neutral.
Bëhet fjalë për Tomor Alizotin dhe Lindita Metaliajn. Alizoti është deputet i qarkut të Beratit, ndërsa Metaliaj është deputete në Lezhë.
Berisha iu ka uruar mirëseardhjen në mbledhjet e grupit tre ligjvënësve duke shprehur kënaqësi për faktin që i shihte aty.
Ndërkohë, nga PD mësohet se Alizoti ka pranuar të jetë njëherësh edhe drejtues politik i qarkut të Beratit, detyrë që e ka mbajtur edhe në të shkuarën.
