Pas tragjedisë me 146 të vdekur në Seul të Koresë së Jugut pas festimeve të Halloëeen, një tjetër ngjarje e rëndë është regjistruar, këtë herë në Indi.
Mediat ndërkombëtare raportojnë se një operacion i madh shpëtimi është duke u zhvilluar në Indinë Perëndimore pasi një urë u shemb në zonën Morbi të Gujaratit, duke lënë të paktën 81 persona të vdekur.
Në atë kohë kishte rreth 400 njerëz mbi ose rreth urës së varur të këmbësorëve mbi lumin Machhu.
Ministri i Brendshëm i Shtetit, Harsh Sanghavi tha se numri i viktimave mund të shkojë në më shumë se 150, ndërsa të paktën 30 persona të tjerë janë konfirmuar si të plagosur nga tragjedia.
Përpjekjet e shpëtimit po vazhdojnë edhe gjatë natës, pasi dhjetëra persona thuhet se janë të zhdukur.
Qindra u zhytën në ujë poshtë qytetit të Morbit, ndërsa dhjetëra të tjerë mbetën të kapur mbi rrënojat e përdredhura të urës për të pritur shpëtimin.
Pamjet video tregojnë njerëz që mbahen mbi urë ndërsa shërbimet e urgjencës përpiqen t’i largojnë prej aty.
Një ekip prej pesë anëtarësh i specializuar në infrastrukturë u caktua për të kryer një hetim mbi fatkeqësinë.
Ura, e njohur si “Julto pul”, është një strukturë 140-vjeçare që ishte rinovuar së fundmi dhe u rihap për publikun javën e kaluar pas gjashtë muajsh punë.
