Vetëm pak ditë pasi publikuan të dhëna nga sistemi TIMS për kryeministrin Edi Rama nga viti 2005 e në vijim dhe zbuluan skandalin e fluturimeve me charter privat prej 2013 kur ka ardhur në pushtet, “HomelandJustice” godet sërish.
Këtë herë hakerat iranianë, të cilët duket se disponojnë të gjithë të dhënat e ruajtura në e-Albania apo TIMS kanë publikuar materiale nga serverët e Drejtorisë së Përgjithshme të Transportit Rrugor.
E gjithë databaza e DPSHTRR që zbulon gjithçka mbi makinat e regjistruar në Shqipëri dhe pronarët e tyre, tashmë është e aksesueshme online lehtësisht.
Në këtë databazë të publikuar, është lista e automjeteve shqiptare, shasia e makinës, lloji, targa dhe emri, mbiemri i qytetarëve të cilën i kanë në pronësi , po ashtu dhe njësia ku ata banojnë.
Në dokument janë bërë të ditura, targat, modeli i automjetit, tipi, ngjyra e tij dhe numri i shasisë.
“Për të mbështetur popullin tonë, ne nuk do të lejojmë që komunizmi të ringjallet në Shqipëri”, shkruan HomeLand Justice në mesazhin e tyre duke publikuar dhe disa foto ushtrie.
