Të shtëna me armë zjarri janë regjistruar mbrëmjen e sotme në lagjen e njohur si “Kodrat e Diellit” në kryeqytet.
Sipas informacioneve paraprake një person ka mbetur i vdekur dhe është dërguar i pajetë në spital.
Ka qenë një person i paidentifikuar ai që ka dërguar pa shenja jete në spital viktimën e identifikuar si 39-vjeçari Briken Sanaj nga Lezha.
Ngjarja e rëndë është regjistruar në një nga lagjet më të sigurta të kryeqytetit, ku mbi 39-vjeçarin është qëlluar teksa po qëndronte në një rrugicë.
Mësohet se pranë Briken Sanajt është afruar një mjet tip “Audi” me ngjyrë të zezë. “Killerat” kanë qëlluar në drejtim të djalit nga Lezha drejt e nga dritarja e mjetit me breshëri kallashnikovi duke i shkaktuar vdekjen e menjëhershme.
Më pas, autorët janë larguar me shpejtësi dhe kundravajtje, madje duke thyer edhe traun e sigurisë që është vendosur sa futesh në zonë.
Sakaq, një person i ndodhur rastësisht në zonë ka tentuar që t’i shpëtojë jetën Sanajt dhe e ka dërguar në spital, por fatkeqësisht i riu ka mbërritur pa jetë në dyert e spitalit.
Njoftimi i policisë:
Më datë 30.10.2022, te Kodra e Diellit, në rrethana ende të paqarta, është qëlluar me armë zjarri shtetasi B. S., rreth 39 vjeç, i cili ka ndërruar jetë rrugës për në spital.
Shërbimet e Policisë kanë shkuar menjëherë në vendngjarje, kanë ngritur pika kontrolli dhe vijojnë krehjen e zonës për identifikimin dhe kapjen e autorit/ëve.
Janë shoqëruar disa persona në Polici.
Në Qafë Kashar, në afërsi të një biznesi pllakash, është gjetur duke u djegur, një automjet.
Grupi hetimor po punon për sqarimin e plotë të rrethanave të ngjarjes dhe për fiksimin e çdo prove të vlefshme që mund të çojë në identifikimin e autorëve.
