Barcelona i ka dhënë lamtumirën Ligës së Kampioneve. Katalanasit janë eliminuar pa luajtur ende ndeshjen e fundit, teksa në 5 takimet e para kanë marrë vetëm një fitore e një barazim.
Eliminimi është konfirmuar zyrtarisht të martën në mbrëmje pas fitores së Interit kundër Plzenit. Eliminimi i parakohshëm nga Liga e Kampioneve është shoqëruar dhe me kosto financiare për klubin.
Mësohet se të paktën 20 milionë euro janë humbur pikërisht për eliminimin nga Champions. Sipas llogarive, Barcelona do të arkëtojë 67.18 milionë euro nga pjesëmarrja në këtë sezon në Ligën e Kampioneve, teksa llogaritë i kishte bërë me afro 90 milionë euro.
Barça ka përfituar 34.11 milionë euro nga renditja historike (skuadra me koeficientin e tretë më të mirë). 15.64 milionë të tjera janë përfituar nga pjesëmarrja (shuma është e njëjtë me 31 klubet e tjera pjesëmarrëse në Champions). Katalanasit mund të arkëtojnë dhe 2.7 milionë euro të tjera nëse fitojnë takimin e fundit në grup përballë Plzenit, ose shuma mund të zbresë në 930 mijë euro, nëse ndahet në barazim.
Në shumën e përgjithshme të arkëtimeve të Barcelonës futen dhe 13.8 milionë euro nga ajo që njihet si “market pool” (reparti i sponsorizimeve, të drejtat TV). Por katalanasit shpresojnë që të amortizojnë disi humbjet nga Liga e Kampioneve me pjesëmarrjen e tyre në Ligën e Europës. Barça shihet si pretendente absolute për fitimin e këtij trofeu. Nëse katalanasit do t’ia arrinin të shkonin deri në finalen e Budapestit dhe ta fitonin atë do të arkëtojnë 14.9 milionë euro. Ky është viti i dytë që Barcelona do të përfundojë me humbje pjesëmarrjen në Champions, ku vjet e mbylli me -12 milionë euro.
