Gjykata e Apelit në Shkodër ka dënuar me 3 vite burg ish-kryebashkiakun e Lezhës, Fran Frrokaj.
Ish-kryebashkiaku akuzohet për “shpërdorim detyre” dhe “tjetërsim prone”. Policia e Lezhës po zhvillon kontrolle për ndalimin e ish-kryebashkiakut dhe të dënuarve të tjerë.
Mediat bëjnë me dije se nga kontrollet e para të dënuarit nuk janë gjetur në banesa. Fran Frrokaj dhe 15 ish-zyrtarë të tjerë të Bashkisë së Lezhës, akuzohen se kanë bërë tjetërsimin e 234 mijë metrave tokë në bregdetin e Ranës së Hedhun në Shëngjin.
Hetimet për tjetërsimin e pronave në zonën e Ranës së Hedhun në Shëngjin kanë nisur në vitin 2017-të, kur në prokurori u denoncua tjetërsimi i i 234 mijë e 548 metër katrore tokë shtetërore ranishte.
Fillimisht në këtë çështje së bashku me kryebashkiakun u arrestuan edhe 22 persona të tjerë, por në gjykatën e shkallës së parë Lezhë dosja u dërgua për 18 persona, nga të cilët vetëm një u shpall i pafajshëm
Prej 7 orësh, Policia ka vijuar kërkimet dhe kontrollet në Shkodër e Lezhë, por deri tani, nuk kanë rënë dot në gjurmët e ish-qytetarit të parë të Lezhës.
