Gara për kreun e Prokurorisë së Posaçme kundër Korrupsionit dhe Krimit të Organizuar tashmë ka kandidatin e parë. Bëhet fjalë për prokurorin Adnan Xholi i cili ka depozituar kërkesën dhe ka shprehur interesin për të qenë drejtues i SPAK-ut.
Xholi ka një karrierë mbi 20-vjeçare në prokurori. Që prej vitit 2013 ai punon në Prokurorinë e Përgjithshme dhe është konfirmuar nga vettingu vitin e kaluar.
Drejtuesi aktual, Arben Kraja përfundon mandatin në datën 18 dhjetor dhe si detyrim këshilli duhet të hapë 3 muaj para garën.
Më 19 dhjetor merr detyrën drejtuesi i ri dhe Kraja mbetet prokuror i SPAK, pasi si prokuror mandati është 9 vite ndërsa si drejtues zgjidhet çdo 3 vite.
Drejtuesi i SPAK nuk ka të drejtë rizgjedhjeje, gëzon vetëm 1 mandat.
