Policia ka publikuar pamjet nga mega-opearcioni në Korçë, ku u bë i mundur arrestimi i 23 personave dhe shpallja në kërkim e 9 të tjerëve, të akuzuar për shpërndarje të lëndëve narkotike.
Arrestimi i këtyre personave vjen në kuadër të fazës së dytë të operacionit “Knock Down 2” për goditjen e grupeve kriminale të shpërndarjes dhe shitjes së lëndëve narkotike. Rreli Nazifi (Aurel Telhai), është kreu i grupit kriminal të shpërndarjes dhe shitjes së drogës në Korçë, i arrestuar nga ky operacion.
Policia bën me dije se janë sekuestruar 700 gramë kokainë, 38 makina si dhe disa lloje te tjera droge, një shumë e konsiderueshme monetare (rreth 50 milionë lekë në euro, dollarë dhe paund) dhe pajisje të tjera. Ky mega-operacion është ndarë në dy faza ku deri tani në total janë proceduar penalisht 197 persona, nga të cilët 54 janë arrestuar, 16 janë shpallur në kërkim dhe vijon hetimi për 127 persona të tjerë.
Policia theksoi se pritet të ketë arrestime të tjera dhe po punohet në këtë drejtim.
