Agim Gjata, i shpallur në kërkim për armëmbajtje pa leje, është arrestuar në Shkodër.
Burime zyrtare nga policia bënë me dije këtë të Enjte se gjatë aksionit për kapjen e tij, 49-vjeçari i dënuar më parë për vrasje, ka qëlluar me armë zjarri drejt forcave speciale.
Aksioni
“Shërbimet e Policisë Kriminale të DVP Shkodër, në bashkëpunim me Komisariatin e Policisë të Vau Dejës, bazuar në inteligjencën informative se një shtetas me rrezikshmëri të lartë shoqërore i shpallur në kërkim për armëmbajtje pa leje po futej në banesë, kanë finalizuar, në bashkëpunim me Forcën Speciale RENEA, operacionin policor të koduar ‘Neutralizimi’. Në momentin që shërbimet e Policisë kanë rrethuar banesën dhe i kanë bërë thirrje shtetasit, në emër të Policisë së Shtetit për t’u dorëzuar, 49-vjeçari ka qëlluar me armë zjarri në drejtim të shërbimeve të Policisë”, njoftoi policia.
“Me ndërhyrjen e shërbimeve të Forcës Speciale RENEA, u bë i mundur neutralizimi i shtetasit që qëlloi me armë zjarri në drejtim të shërbimeve të Policisë. Në pranga shtetasi i shpallur në kërkim për armëmbajtje pa leje, A.Gj., 49-vjeç, banues në Barbullush, i dënuar më parë për vrasje”, shtuan të njëjtat burime.
Shërbimet e Forcës Speciale RENEA i kanë sekuestruar në cilësinë e provës materiale armën e zjarrit kallashnikov dhe gjatë kontrollit, i kanë gjetur dhe i kanë sekuestruar 49-vjeçarit edhe një armë zjarri tjetër pistoletë dhe një palë dylbi.
Vrasja e fqinjit
Në Qershor të vitit 2011, Agim Gjata u arrestua nga policia si autor i vrasjes së një fqinji të tiji në fshatin Barbullush të Komunës Bushat në Shkodër.
Sipas raportimeve të kohës, viktima, një 61-vjeccar u qëlluar me armë zjarri nga Gjata pas një sherri që nisi për motive të dobëta.
Pas ngjarjes, autori u largua për tu vënë në pranga një ditë më pas nga forcat speciale policore.
Ai u vetëdorëzua pas negociatave të gjata me policinë.
