Ish-drejtoresha e Autoritetit Rrugor Shqiptar, Sonila Qato u paraqit për të dytën herë në Prokurorinë e Posaçme brenda muajit.
Sipas disa raportimeve mediatike, Qatos i është komunikuar akuza për shpërndorim detyre lidhur me hetimin për tenderin e rrugës Kardhiq-Delvinë. Megjithtë, ende nuk ka një konfirmim zyrtar nga organi i akuzës.
Pas daljes nga SPAK, ajo nuk bëri asnjë koment për gazetarët.
Qato u thirr në SPAK edhe më 3 Tetor, kur qëndroi në ambientet e Prokurorisë së Posaçme rreth 2 orë. Pas daljes, në një prononcim për gazetarët, Qato tha se ishte pyetur në cilësinë e personit që ka dijeni për hetimet që SPAK po kryen për tenderin e rrugës Kardhiq-Delvinës.
“Është një procedurë e cila ka filluar sikurse e dini 3 vjet më parë, me dorëheqjen time nga ARRSH. Një procedurë nga e cila dhashë detaje nga rrethanat e çështjes, në dijeninë time. Procedura e kallëzimit është procedura e Kardhiq-Delvinës. U pyeta në cilësinë e personit që ka dijeni për rrethanat e çështjes”, tha ajo.
Vetë Qato tha se hetimet e prokurorisë po zhvillohen për shkelje të barazisë në tendera.
“Mesa u njoftova për shkelje të barazisë në tendera. Përderisa prokuroria është duke kryer veprimet e veta proceduriale unë mendoj edhe shkaku i dorëheqjes time në 2019 ka qenë pikërisht dhënia e mundësisë prokurorisë për të vënë drejtësi dhe për të nxjerrë të vërtetën në pah, kështu që lejojeni prokurorinë ashtu sikurse dhe unë, të bëjë detyrat e veta”, deklaroi.
Në 2020-n, ishte Kontrolli i Lartë i Shtetit që e kallëzoi penalisht në prokurori Sonila Qaton dhe tre anëtarë të grupit të prokurimit që kanë vlerësuar ofertat për ndërtimin e tunelit në aksin Kardhiq-Delvinë.
KLSH ngriti dyshime për fiksim të tenderit me vlerë 23 milionë dollarë. Aty morën pjesë 6 kompani, ku 5 firma që paraqitën ofertën më të ulët u s’kualifikuan dhe fitoi kompania e cila dha shumën më të lartë për të realizuar punimet.
Kontrolli i Shtetit kërkoi dokumentacionin nga ana e Autoritetit Rrugor për këtë tender, por ai nuk iu vu në dispozicion. Pas shqyrtimit të dokumenteve elektronikë të sistemit, KLSH doli në konkluzionin se një firmë me një ofertë prej 611 milionë lekësh apo 6 milionë dollarësh më pak ishte s’kualifikuar, edhe pse përmbushte të gjithë kërkesat e garës. Kjo diferencë konsiderohet si dëm ekonomik nga ana Kontrollit të Lartë të Shtetit.
Pasi firma me ofertën më të ulët e ankimoi në një shkallë më të lartë, në Komisionin e Prokurimit Publik i cili i dha të drejtë, ARRSH nuk e zbatoi vendimin. Kjo konsiderohet si një shkelje me pasoja të rënda për interesat e shtetit nga ana e KLSH-së.
Për të njëjtën arsye, edhe kompania në fjalë e kallëzoi penalisht për shpërdorim detyre Qaton, në Shtator të 2019-s, ndërsa ajo, dy ditë më pas, dha dorëheqjen.
