Sekretari i Përgjithshëm i NATO-s, Jens Stoltenberg, shprehet se retorika bërthamore e presidentit rus Vladimir Putin “është e rrezikshme e pamatur dhe e papërgjegjshme”.
Stoltenberg foli gjatë një vizite në aeroplanmbajtësen U.S.S. George H.Ë. Bush.
Departamenti Amerikan i Mbrojtjes bën me dije se anija po merr pjesë në një stërvitje të NATO-s në Detin Adriatik.
“Rusia tani pretendon në mënyrë të rreme se Ukraina po përgatitet të përdorë një bombë radiologjike në territorin e saj. Aleatët e NATO-s e hedhin poshtë këtë pretendim të rremë. Rusia shpesh akuzon të tjerët për atë që synon të bëj vetë. Ne e kemi parë këtë të ndodhë më parë, nga Siria në Ukrainë. Rusia nuk duhet të përdorë pretekste të rreme për përshkallëzim të mëtejshëm. Bota po e vëzhgon nga afër,” – u shpreh Stoltenberg.
Shefi i NATO-s përshëndeti sanksionet ndërkombëtare kundër Iranit, duke thënë se ky shtet po ofronte mbështetje për përpjekjet luftarake të Rusisë. Ai e cilësoi “të papranueshme”.
Komentet e tij erdhën në të njëjtën ditë kur operatori i energjisë bërthamore i Ukrainës tha se forcat ruse kanë kryer punë sekrete në termocentralin më të madh bërthamor në Evropë.
