Ministria e Financave dhe Ekonomisë ka nisur diskutimet mbi draftin e Paketës Fiskale 2023, por kjo paketë ka shkaktuar pakënaqësi nga radhët e sipërmarrjes.
Eksperti i ekonomisë, Azmi Stringa, i pranishëm në emisionin “EkoFax” tha se gjatë vitit të ardhshëm do ketë një rritje të barrës fiskale për disa grupe shoqërore.
“Ky është një vit, që do kemi rritje të barrës fiskale për disa grupe shoqërore. Qeveria parashikon të mbledhë 29% të PBB të planifikuar për vitin përmes të ardhurave nga tatimet dhe doganat”, tha ai.
Ai theksoi se fokusi kryesor duhet të jetë mirëmenaxhimi pasi kjo qasje jo vetëm lehtëson barrën fiskale, por çliron ekonominë.
“Fokusi tek mirëmenaxhimi nuk sjell zhvillime vetëm në lehtësimin e barrës fiskale, por kjo çliron edhe ekonominë”, shtoi ai.
