Kreu i Partisë së Lirisë, Ilir Meta konfirmoi këtë Mërkurë se PL do të përfshijë kandidatët e saj në primaret që do të zhvillojë PD për të përcaktuar kandidatët për zgjedhjet lokale.
“PL respekton primaret, është risi e jashtëzakonshme”, tha Meta pas takimit me Sali Berishën në selinë e PD-së. Meta kërkoi që procesi të zhvillohet sa më shpejt.
“Kemi kërkuar që të realizohet sa më shpejt ky proces. Kudo ku kemi kandidatë të cilët premtojnë për komunitetin e tyre, do ti përfshijmë në primare të përbashkëta me PD dhe parti të tjera të opozitës. E rëndësishme që kandidatët të respektojnë njëri-tjetrin, përndryshe cilido që përdor primaret jo për të shpalosur programin e tij por për të dëmtuar kandidatët e tjerë të përjashtohet”, tha Meta.
Duke iu përgjigjur interesimit të gazetarëve, kreu i PL-së tha se “s’ka pasur diskutim për emrin që do jetë kandidat në Tiranë dhe kudo tjetër se ky është një proces që e vendosin primaret”.
Por, ai shtoi se i ka propozuar një emër për kryetar të parlamentit të Tiranës, Berishës dhe sipas Metës, kreu i PD-së e mirëpriti.
“Çdo të hënë do ketë këshill bashkiak për të mbështetur qytetarët, për të dëgjuar hallet dhe problemet e tyre. Nënë Liza s’do rrijë atje në rrugë, por do të flasë atje si zonjë në parlamentin e Tiranës dhe gjithë qytetarët që kanë padrejtësi do të flasin atje”, shtoi Meta.
Ndërkohë, burime bëjnë me dije se nesër pritet edhe prezantimi i kandidatëve për bashkinë e Tiranës nga PD. Pas një marrëveshjeje parazgjedhore Meta-Berisha që pritet të firmoset brenda këtyre 24 orëve, do të ketë edhe një datë për protestën e radhës të organizuar nga opozita e bashkuar.
