Përfaqësues të SPAK dhe autoriteteve ligjzbatuese italiane mbajtën një konferencë për mediat nga Tirana, ku dhanë detaje për aksionin që çoi në sekuestrimin e dy “call center-ave” në kryeqytet.
Prokurori Eneid Nakuçi dha detaje sesi josheshin italianët të investonin, ndërsa shtoi se paratë e përfituara nga grupi kriminal nuk janë gjetur.
Ndërkohë, mësohet se tre personat e arrestuar janë Elisa Caci, Valbona Abedinaj dhe Gilberdo Pushani.
Prokurori Nakuçi tha se grupi ka mashtruar një numër të madh qytetarësh italianë. “Në shifra paraprake mendohet se janë dëmtuar deri në 3 milionë euro, por shtoi mund të jetë është më e lartë”, shtoi.
Hetimet
Gjatë konferencës u bë e ditur se njësia C e Hetimit Kibernetik në Policinë e Shtetit Shqipëri, së bashku me partnerët Italianë dhe më saktësisht me Hetuesit e Grupit të Gatshëm në qytetin e Pordenone dhe të Qendrës Operative për Sigurinë Kibernetike – Policia e Telekomunikacionit në Friuli Venezia Giulia, me bashkëpunimin e Shërbimit të Policisë së Postës e Telekomunikacionit, të Shërbimit Qendror Operativ si dhe të Shërbimit për Bashkëpunimin Ndërkombëtar dhe të Policisë si dhe të Zyrës së Ekspertit për Sigurinë në Shqipëri, kanë kryer në Tiranë, 5 kontrolle ndaj shtetasve shqiptarë të arrestuar dhe në zyrat ku dyshohej se ndodheshin call center-at. Mendohet se kjo organizatë ka arritur të mashtrojë qindra qytetarë italianë, banues në të gjithë territorin Italian, për një total prej më shumë se tre milionë euro, me gjasë kjo shifër është vetëm maja e ajsbergut pasi mendohet se shifra mund të jetë më e lartë.
Hetimet kanë filluar pas denoncimit të bërë në Policinë e Postë-Telekomunikacionit në qytetin e Pordenone, Itali ku pas verifikimeve të mëtejshme ka dalë një skemë mashtrimi mjaft komplekse sipas së cilës, viktimat kontaktoheshin nëpërmjet telefonit, ku bindeshin nga mashtruesit për të investuar fillimisht shifra të vogla, të cilat transformoheshin në fitime jashtëzakonisht të mëdha. Disa prej viktimave në fakt kanë parë se si investimet e tyre janë trefishuar në vetëm pak ditë, duke i parë fitimet e tyre nëpërmjet disa platformave në rrjet të krijuara enkas nga grupi kriminal për ta bërë akoma më të besueshëm investimin.
Gjatë hetimit ka rezultuar se autorët e kësaj skeme kanë qenë shumë të saktë në përdorimin e skemave për të bindur qytetarët në derdhjen e qindra mijëra eurove në llogaritë e tyre të vendosura dhe jashtë vendit të tyre të veprimit.
Mashtruesit ishin mjaft të aftë duke qenë të afërt me viktimat potenciale: bisedat e tyre ishin për emergjencën e pandemisë po ashtu edhe për situata personale apo sentimentale dhe familjare të viktimave dhe shfrytëzonin vetminë e krijuar nga situata e pandemisë duke u vetëofruar si miq dhe persona të besuar.
Viktimat ishin si gra dhe burra të të gjitha moshave, shtëpiakë, profesionistë dhe pensionistë banues në të gjithë Italinë, dhe që kishin dëshirën për të fituar para lehtësisht.
Propozimi i parë i evidentuar i investimit kishte të bënte me blerjen e aksione në Amazon në vlerën e 250 € dhe të fitimit brenda një jave. Në bazë të bisedave të bëra me viktimat, mashtruesit propozonin shtrirjen e investimit drejt kriptovalutës BitCoin pasi sipas tyre investimi do të rritej shumë si pasojë e futjes së produktit të vaksinave në treg.
Grupi kriminal kishte arritur të ngrinte një call center të vërtetë, me role të ndryshme në brendinë e tij: në fakt, kishte operatorë të cilët ishin të ngarkuar me kontaktimin e klientëve dhe verfikimin e gatishmërisë së tyre për të investuar si dhe “konsulentë” të vërtetë të cilët ndiqnin hap pas hapi viktimat drejt investimit më fitimprurës.
Besnikëria e “klientit” ishte kaq efikase sa viktima në pjesën më të madhe të rasteve, e ka lejuar mashtruesin të përdorte në distancë kompjuterin personal, i cili në kohë reale realizonte transfertat e parave nëpërmjet kontrollit të një softueri në distancë të quajtur “Anydesk”. Gjithsesi, mashtruesit nuk mjaftoheshin me kaq: mjaft të shpeshta ishin në fakt kontrollet e e-maileve, fotografive, dokumenteve të viktimave. Të gjitha këto informacione shfrytëzoheshin për të bërë atë që quhet social engineering për të “patur në dorë” viktimat në rast se ata do të hezitonin për të bërë investime të tjera. Jo në pak raste, atëherë kur ata perceptonin hezitime tek viktimat, bëheshin agresivë dhe të pamëshirshëm duke shfrytëzuar në këtë rast informacionet e marra dhe duke bërë të mundur që t’i bindnin duke u kërkuar financime për investimet e reja.
Në raste të tjera, viktimat me vullnet të lirë u jepnin kredencialet e aksesit në shërbimet bankare në rrjet “konsulentëve” të tyre me qëllimin për të përshpejtuar kryerjen e investimeve në momentin kur tregu paraqiste luhatje të përshtatshme.
Të shumta ishin gjithashtu arsyet që mashtruesit përdornin sa herë që viktimat kërkonin të tërhiqnin fitimet e tyre të rreme. Ndër to ishte pretendimi për t’i paguar një komision për zhbllokimin e fondeve një agjencie të Bashkimit Europian për shkak të Brexit. Këto shuma akoma dhe njëherë kalonin në llogarinë e grupit kriminal i cila natyrisht që nuk kthente mbrapsht as “investimin” fillestar.
“Modus operandi”
Analiza e llogarive rrjedhëse bankare, e realizuar nga hetuesit nëpërmjet verifikimeve të ndryshme ku janë përfshirë shtete të ndryshme anëtare të Bashkimit Europian ndër to Qipro, Lituania, Estonia, Hollanda dhe Gjermania kanë nxjerrë në dritë faktin se paratë e viktimave në pjesën më të madhe të rasteve, shndërroheshin në kriptovaluta të lidhura me llogari rrjedhëse jashtë shtetit në mënyrë që të bëheshin të pagjurmueshme.
Falë aktiviteteve hetimore teknike, tradicionale dhe kibernetike është bërë e mundur identifikimi i eksponentëve më në zë të organizatës dhe në veçanti të administratorit të shoqërisë dhe dy prej “konsulentëve” më të besuar dhe më të zotë në mashtrimin e qytetarëve italianë.
Grupi kriminal kohët e fundit po ristrukturohej dhe zgjerohej, duke ndryshuar dhe vendndodhjen e veprimtarisë kriminale gjë e cila u konstatua dhe gjatë operacionit policor të përbashkët.
Ditën e djeshme, ndërsa në Tiranë po kryhej operacioni policor ku po kryheshin 5 kontrollet, ekzekutoheshin masat paraprake si dhe po sekuestroheshin pajisjet kompjuterike, në Itali, me urdhër të Prokurorisë së Pordenone, u procedua njëkohësisht me sekuestrimin e Serverit të ndodhur në shtetin Italian, duke realizuar kështu një fikje totale të infrastrukturës së përdorur nga organizata. Hetimi po vazhdon për konkludimin e plotë të këtij aktiviteti kriminal.
Prokurori Italian Raffaele Tdeklaroi se “nga hetimet e para janë 220 viktima në Itali dhe një shifër e madhe parash të humbura, por besojmë se personat e dëmtuara mund të arrijnë në 1200 të dëmtuar. Shqetësimi im është që kjo para që vjen e fituar me anë të mashtrimit mund të përdoret për qëllime të dëmshme”.
“Nuk besojmë se do të rikuperojmë paratë. Mekanizmi i Bitcoin na tregon se është shumë e vështirë të rikuperohet kjo para por duhet të paralajmëroj të gjithë që të investoni në institute të certifikuara nga autoritetet shtetërore. Duhet të kesh respekt për paranë. Mos u bëni të pangopur. Kur ka fitime të shpejta kuptohet që ka diçka që nuk funksionon”, shtoi ai.
Prokurori italian ka bërë me dije serveri që u përdor për skemën e mashtrimit online për investim në bursa u gjet në sistemin “Aruba”. Hetimet kanë zgjatur rreth 1 vit, ndërsa aktiviteti për mashtrim ka nisur prej vitit 2019, bëri me dije prokurori.
Lexo edhe: Zbulohet mashtrimi miliona euro, sekuestrohen 2 “call center-a” në Tiranë
