Suning ka derguar mandat te firma ligjore në Los Anxhelos, Latham & Watkins, që të kujdeset për aspektet ligjore të shitjes së Interit. Sportmediaset thekson se si familja Zhang po punon ende shumë për të gjetur blerës për zikalterit, pasi kohët e fundit u kanë dhënë mandate bankave amerikane Raine Group dhe Goldman Sachs për të ndihmuar me shitjen e klubit.
Latham & Watkins me sa duket do të kujdeset për aspektet specifike ligjore të një marrjeje. Pronarët e Interit raportohet se janë të pakënaqur me këto thashetheme dhe sqaruan se bisedimet kanë të bëjnë me kërkimin e një aksionari të ri minoritar, por kjo do të diskutohet më tej gjatë takimit të Steven Zhang me aksionerët më vonë këtë javë.
Muajin e kaluar, Zhang u takua me pronarin e Sacramento Kings, Vivek Ranadive për të diskutuar një marrëveshje të mundshme, por gjërat kanë rënë në qetësi në këtë front javët e fundit. Raportet sugjerojnë se Suning po kërkon të përfundojë shitjen e Interit përpara majit 2024, kur ata do të duhet të paguajnë 275 milionë euro te Oaktree për shkak të një huazimi të bërë me normë interesi 12%.
Familja qe zoteron Suning, pra ajo Zhang, renditet ndër 500 sipërmarrjet private kineze më të mira në vitin 2020 me një qarkullim prej 665.26 miliardë RMB kineze (mbi 102 miliardë dollarë amerikanë). Suning.com, i njohur më parë si Suning Commerce Group, është një kompani kineze në pronësi publike që operon në sektorin e shitjes me pakicë të pajisjeve shtëpiake dhe produkteve elektronike.
Ajo është e listuar në bursën e Shenzhen që nga viti 2004. Që nga viti 2021, është grupi i 328-të në botë për nga qarkullimi në Fortune Global 500. Në detaje, të ardhurat e Suning.com ranë me 60% nga 93.6 në 37.2 miliardë juanë (d.m.th. nga rreth 13.1 në 5.2 miliardë euro): në veçanti, të ardhurat nga shitja e mallrave arritën në 32.861 miliardë juanë, një rënie nga viti në vit prej 62.68%.
