Nga Boldnews.al
Sekuestrimi i rreth 60 mijë metra katrorë tokë në zonën e Gjilekës, në Dhërmi, ka bllokuar planet e disa biznesmenëve të fuqishëm për të ndërtuar resorte dhe fshatra turistikë mbi sipërfaqet e konstatuara si të fituara nëpërmjet falsifikimit të dokumentave.
Prokuroria e Vlorës njoftoi pak ditë më parë se kishte identifikuar shkelje penale në regjistrimin e disa sipërfaqeve tokë në zonën bregdetare në bashkinë e Himarës, me vlerë totale tregu rreth 8 milionë euro.
Në bazë të këtij hetimi, gjykata e Vlorës pranoi kërkesat e prokurorisë dhe lëshoi urdhër arrestet për 24 persona, kryesisht ish-zyrtarë lokalë dhe persona që kanë kryer falsifikimin e pronave.
“Boldnews.al” mëson se disa sipërfaqe të tokave të sekuestruara ishin pjesë e planeve për resorte të të paktën dy bizneseve të fuqishme; “Gjikuria” e Florenc Gjikuria dhe “Orion Construction”, në pronësi të biznesmenit Ardian Nelo.
Nga hetimet e deritanishme të Prokurorisë së Vlorës nuk rezulton që dy biznesmenët të jenë përfshirë në falsifikimin e pronave.
Megjithatë, tokat e siguruara prej tyre nëpërmjet kontratave të porosisë me personat e dyshuar për falsifikim, tashmë janë vendosur nën sekuestro preventive.
Gjikuria
“Boldnews.al” ka mësuar se kompania “Gjikuria”, në Mars të vitit 2022 ka nënshkruar një kontratë premtim-shitje me familjen Leka në Gjilekë të Himarës, për një sipërfaqe toke 4 mijë metra katrorë.
Menjëherë pas nënshkrimit të kësaj kontrate, kompania “Gjikuria” ka aplikuar për regjistrimin e saj pranë Agjencisë Shtetërore të Kadastrës, dega Vlorë.
Në planet e kompanisë “Gjikuria” mendohet se ka qenë ndërtimi i një resorti turistik në zonën e preferuar të Dhërmiut.
Por, ndërkohë që kontrata e porosisë është regjistruar në ASHK, hetimet e prokurorisë së Vlorës zbuluan se prona prej 4 mijë metrash katrorë, së bashku me shumë sipërfaqe të tjera në atë zonë, ishin përfshirë në një skemë falsifikimi nga persona zyrtarë e privatë.
Në këto kushte, në listën e pronave të sekuestruara nga gjykata, është përfshirë edhe sipërfaqja e tokës e marrë me premtim-shitje nga “Gjikuria”.
Orion Construction
Në të njëjtën pozitë aspak komode duket se është edhe biznesmeni Ardian Nelo, pronar i “Orion Construction”.
Sipas të dhënave hetimore rezulton se Nelo ka aplikuar pranë ASHK-së së Vlorës për regjistrimin e Aktit të Marrjes së Tokës në Pronësi (AMTP), me sipërfaqe 1430 metra katrorë, me pronar Odhise Ruci.
Aplikimi është pranuar dhe është regjistruar në Agjencinë e Kadastrës së Vlorës në vitin 2022.
Edhe në këtë rast, besohet se biznesmeni Nelo ishte përgatitur për ndërtimin e një strukture turistike në bregun e Dhërmiut.
Por, njëlloj si “Gjikuria”, edhe kompania “Orion Construction” do të duhet të shtyjë planet për një kohë të pacaktuar, deri sa të qartësohet plotësisht dhe me vendim gjykate çështja e pronësisë së tokës.
Hetimet
Prokuroria e Vlorës ka nisur hetimet kryesisht në vitin 2020, pas një serie informacionesh të mbërritura pranë saj për falsifikime pronash në zonën bregdetare të Dhërmiut kryesisht, por edhe në pjesë të tjera të territorit të Himarës.
Në kuadër të këtij hetimi, fillimisht, në Tetor 2021, janë arrestuar ish-drejtuesi i Kadastrës së Vlorës, Klodian Troci, ish-drejtori i Tokave në Këshillin e Qarkut, Bardhyl Gjika, si edhe përfituesi Spiro Duni.
Në vijim, Prokuroria e Vlorës lëshoi në 20 Tetor të këtij viti urdhërat e arrestit për 24 persona të tjerë, mes të cilëve edhe ish-kryetari i Këshillit të Qarkut, Anesti Dhimojani, ndaj të cilit është caktuar masa “arrest në shtëpi”.
Në një njoftim të Prokurorisë së Vlorës thuhet se personat e arrestuar, duke filluar nga viti 2020 e në vijim “kanë nxjerrë nga arkivat e kadastrës së Këshillit të Qarkut Vlorë dokumenta origjinale si Akte të Marrjes së Tokës në Pronësi, Akte të Marrjes së Tokës në Përdorim, Formularë nr.6 etj, dokumente të cila janë riprodhuar duke hequr origjinalet e ndara sipas ligjit.7501 “Për ndarjen e tokave bujqësore” duke i zëvendësuar ato me dokumente të riprodhuara dhe të falsifikuara, duke shtuar në to sipërfaqe fiktive të tokës në bregdet”.
Sipas Prokurorisë, dokumentat e falsifikuara janë rifutur në arkivën e D.A.M.T-së pranë Këshillit të Qarkut Vlorë si dokumente origjinale dhe nga ana e personave të interesuar është kërkuar kopje e njehsuar e tyre në rrugë zyrtare me kërkesë në Kadastrën e Qarkut Vlorë.
Në vijim kopja e njehsuar e këtyre dokumentave pronësorë me shkresë përcjellëse u dërgohej personave të interesuar, Bashkisë Himarë ose Agjencisë Shtetërore të Kadastrës Vlorë, me qëllim për t`u përdorur më pas për dhënien e akteve të reja të pronësisë dhe hipotekimin e tyre pranë A.SH.K.Vlorë.
Gjatë hetimeve të kryera deri në këtë fazë të hetimit, mbi bazën e akteve të administruara si dhe akteve të ekspertimit tekniko-grafik të kryera nga ana e Institutit të Policisë Shkencore Tiranë, ka rezultuar e provuar se dokumentacioni i disa prej praktikave të sekuestruara që bëjnë fjalë për pasuri të regjistruara në zonën e Himarës dhe të Dhërmiut, ka rezultuar i falsifikuar.
