Ish-ministri i Financave në Britaninë e Madhe, Rishi Sunak konfirmoi zyrtarisht se ai është në garë për të zëvendësuar Liz Truss në postin e kryeministrit, pak pasi u largua nga shtëpia e tij në Londrën perëndimore.
“Mbretëria e Bashkuar është një vend i madh, por ne përballemi me një krizë të thellë ekonomike. Kjo është arsyeja pse unë do të jem lider i Partisë Konservatore dhe kryeministri juaj i ardhshëm”, shkroi ai në një postim në Twitter.
Sunak u mund nga Truss në garën për të zëvendësuar Boris Johnson në Shtator, pasi humbi zgjedhjet e mbajtura nga anëtarët e partisë Konservatore në të gjithë vendin.
Ish-ministri i Financave ka marrë më shumë mbështetje nga ligjvënësit konservatorë sesa rivalët e tij si ish-ministrja e Mbrojtjes Penny Mordaunt dhe ish-kryeministri Boris Johnson, i cili po përpiqet të rikthehet.
Sunak u largua nga qeveria e Johnson në Korrik, duke ndihmuar në nxitjen e një vale rebelimi nga anëtarët e Partisë Konservatore, gjë që bëri që ish-kryeministri të dorëhiqej. Disa konservatorë kanë paralajmëruar se rikthimi i Boris Johnson në postin e kryeministrit mund të krijojë më shumë kaos politik.
