Fushata për zgjedhjet lokale të vitit 2023 ka nisur ethshëm në vendm teksa tre liderët Edi Rama, Sali Berisha dhe Ilir Meta kanë zbritur në terren duke zhvilluar takime me bazën.
E fundit në radhën e takimeve për kreun e Partisë së Lirisë, Ilir Meta është Kuçova, ku ai është ndalur këtë të shtunë në një takim me strukturat e partisë.
Pranë Metës u pa ish-deputeti Lefter Maliqi, i cili përflitet si kandidat i mundshëm i opozitës për bashkinë e Kuçovës dhe tanimë drejton strukturat e PL aty.
Në fjalën e tij, Maliqi u ndal te roli i Metës në politikë, duke thënë se në kohën kur Meta u votua për President, Rama ka dhënë urdhër që simpatizantët e LSI të joshen dhe të mbahen në punë në administratë.
“Ky i pabesë i dha urdhër administratës që njerëzit e LSI të joshen shantazhohen e mbahen në punë. Kemi bërë verifikim paraprak nga 1300 anëtarë 774 janë në administratën e shtetit në bashki, në hipotekë, në arsim në shëndetësi e na thonë jemi me ju edhe brenda bashkisë por në momentin e punësimit nuk angazhohemi dot. Ne anëtarësuam 311 të rinj e në takimin tjetër do mbushen sheshet”, tha Maliqi.
Ndërkohëm ndër të tjera ish-deputeti i tha Metës se atij nuk i shkonte “kostumi i Presidentit” pasi është njeri i shesheve dhe betejave, por shtoi se do të duhej të kishte qenë Kryeministër në vend të Ramës.
“Zoti Meta. Ju nuk jeni lider i sallave të mbyllura, jeni lider i shesheve. Nëse në takimin e dytë nuk do mbushen sheshet ju them me bindje që mbaj përgjegjësi. Do mbushen e do buçasin sheshet e do ia rrëmbejme pushtetin lokal që e kanë të paaftët, abuzuesit që tallen me taksat e qytetarëve të Kuçovës. Ky Rama i intrigave, djallëzisë, ca ka bërë me LSI se ju ikët President por nuk ju takonte ai kostum Presidenti. Ju duhet të ishit kryeminister në vend të tij”, nënvizoi Maliqi.
