Çelsi dhe Mançester Junajtid kanë ndarë nga një pikë në duelin mes tyre në Premier Ligë në një barazim 1-1 ku protagonist ishte edhe Armando Broja. Sulmuesi i përfaqësuesëa shqiptare fitoi penalltinë e avantazhit të përkohshëm 1-0 të realizuar nga Zhorzhinjo, teksa në fund ishte Kasemiro i cili barazoi në minutat shtesë të sfidës.
Një penallti e cila ka shkaktuar shumë polemika, pasi “djajtë e kuq” mendonin se gjyqtari kishte gabuar me vendimin e tij duke akorduar si faull për penallti mbajtjen e Skot MekTominei ndaj Brojës në zonë. Këtë e tha qartësisht Bruno Fernandes pas përfundimit të sfidës.
Ai kishte qenë një ndër lojtarët më të zëshëm në protestat në fushë dhe shpjegoi për “Sky” se çfarë kishte folur me gjyqtarin e ndeshjes.
“i thashë gjyqtarit që në Premier Ligë, ky lloj kontakti ndodh në çdo ndeshje. Unë nuk e pashë vetë, nuk di të them nëse ishte i drejtë apo jo. Skot tha që nuk po e mbante, ndërsa unë nuk di çfarë të them”, theksoi Bruno Fernandes pas përfundimit të takimit.
