Përplasjet në Komisionin e Ligjeve për dy projektligje të ndryshme për hapjen e dosjeve të ish-Sigurimit të Shtetit dhe “kërcënimet” e grupit të deputetëve përkrah Enkelejd Alibeaj se nuk do të bashkojnë votat me mazhorancën për të kaluar ligje mbi individë të caktuar ranë poshtë ditën e djeshme në Kuvend.
Teks mesnata po afronte, Alibeaj dhe të besuarit e tij bashkuan votat me PS e kryeministrit Edi Rama duke bërë që në Kuvend të miratohej projektligji për ndryshimet në ligjin “Për të Drejtën e Informimit për dokumentet e Ish-Sigurimit të Shtetit të Republikës Popullore Socialiste të Shqipërisë”, që në thelb përmbante të gjitha amendamentet e paraqitura nga PS-ja në Komision.
Edhe pse Edi Rama e tha qartë dhe pastër në fjalën e tij se “ne këtu në këtë proces na solli shtetasi I.M.”, duke lënë të kuptohet se propozimi kishte për qëllim largimin e Ilir Metës nga politika, pjesa e deputetëve demokratë të udhëhequr nga Alibeaj, të cilët kanë gjithashtu një marrëdhënie përplasjeje me kreun e Partisë së Lirisë, shfrytëzuan mundësinë për të kërkuar një ndërhyrje më radikale ndaj trashëgimisë së ish Sigurimit të shtetit.
Kuvendi kështu miratoi me 94 vota pro dhe 2 abstenim projektligjin, por ajo që bie në sy në procesverbalin e Kuvendit për këtë seancë, është guximi i dy deputetëve të PS për të devijuar nga rruga e diktuar nga kryeministri Rama.
Sekretari i Përgjithshëm i PS, Damian Gjiknuri dhe kryetari i Komisionit të Sigurisë, Nasip Naço duket se kanë qenë të pavendosur për të votuar pro apo kundër hapjes së dosjeve, duke abstenuar. Një tjetër detaj që merr vëmendjen është shfaqja e Lulzim Bashës në Kuvend për të votuar pro ligjit, teksa nuk u pa gjatë ditës dhe nuk u përfshi në debat.
Deputetët e PD që votuan pro hapjes së Dosjeve:
- Gazment Bardhi,
- Bledjon Nallbati
- Agron Gjekmarkaj
- Lulzim Basha
- Merita Bakiu
- Desantila Tahiraj
- Emila Koliqi
- Mesila Doda
- Saimir Korreshi
- Nusret Avdulla
- Kreshnik Çollaku
- Eralda Bano
- Seladin Jakupllari
- Andia Ulliri
- Flamur Hoxha
- Flutura Açka
- Jorida Tabaku
- Lefter Gështenja
- Arbi Agalliu
- Helidon Bushati
- Ilda Dhori
- Orjola Pampuri
- Enkelejd Alibeaj
- Dhurata Tyli Çupi
- Dashnor Sula
Damian Gjiknuri abstenim
Nasip Naço abstenim
