Projektbuxheti për vitin e ardhshëm, të cilin Ministria e Financave e ka kaluar për konsultim në Komisionin e Ekonomisë dhe që ka grumbulluar shumë kritika nga organizatat e sipërmarrësve, e ka kritikuar edhe opozita.
Pas kreut të Partisë së Lirisë, Ilir Meta që akuzoi qeverinë se po falimenton prodhuesit vendas të birrës me rritjen e akcizës dhe goditjen e prodhuesve të energjisë, PD ka reaguar me anëtarin e Këshillit Kombëtar Dorian Teliti.
Sipas tij, me buxhetin e vitit të ardhshëm do të mbështeten miqtë e qeveritarëve, pra oligarkët që lidhen me financimit e skemës PPP.
“Plot 116 milionë euro për 10 kontratat PPP do të jepen gjatë vitit të ardhshëm. Këto 10 kontrata PPP do të marrin tre herë më shumë fonde se ç’marrin 65 mijë familje me ndihmë ekonomike gjatë gjithë 2023. Do të jetë buxheti i shpërdorimit me shpenzimet operative të qeverisë për rehatllik, ku fondet do të rriten edhe më tej me 15 milionë euro”, deklaroi Teliti.
DEKLARATA E PLOTË:
Dëgjuam sot me zë dhe figurë se si qeveria shqiptare do të vazhdojë për të nëntin vit rradhazi të abuzojë me taksat tuaja dhe të shpërdorojë fondet publike.
Dëgjuam sot se si me mjeshtërinë e fjalës por me dobësin e fakteve, qeveria shqiptare, po mundohet t’i hedhë hi syve shqiptarëve, syve tuaj, duke u munduar t’ju binde se po bën çmos për ju.
Por e vërteta është krejt e kundërt.
Projekbuxheti i vitit të ardhshëm nuk është aspak serioz, nuk është buxheti i duhur për shqiptarët dhe sipërmarrjen, por mbështet si përherë vetëm disa miq e shokë të lidhur ngushtësisht interesat me qeveritarët, ndërkohë që vazhdon të braktisë nevojtarët dhe godet me rritje taksash e gjobash sipërmarrjen vendase.
Ky nuk është buxheti i shëndetësisë dhe arsimit, pasi financimi i tyre do vazhdoje të jetë minimalist dhe rezulton të jetë vetëm gjysma e nevojave reale për një arsim dhe shëndetësi dinjitoze.
Nuk është buxheti i fermerit, pasi do të jemi përsëri të fundit për subvencionimin e tyre, ndërkohë që vendet e rajonit financojnë të paktën 3 herë më shumë.
Nuk është buxheti i rritjes së pagave, pasi rritja reale e tyre nuk parashikohet gjatë vitit 2023.
Nuk është buxheti i pensionistëve, të cilët vuajnë rritjen dyshifrore të çmimeve të shportës së konsumit, ndërkohë që qeveria u thotë: “mjaftohuni me vetëm 1% rritje pensionesh”.
Nuk është buxheti i ish të përndjekurve politikë, të cilët të harruar e të nëpërkëmbur përballen edhe këtë vit me përbuzjen dhe braktisjen e qeverisë. Me këto ritme të financimit do duhen 30 vjet për të ezauruar detyrimin financiar ndaj kësaj shtrese të përvuajtur nga regjimi famëkeq që lamë pas në vitet ‘90.
Ky nuk është buxheti i shqiptarëve dhe bizneseve në nevojë, pasi asnjë qindarke nuk do jepet për ndonjë paketë sociale ndihme, ndërkohë që vendet e ngjashme të rajonit kanë dhënë paketa disa herë më të larta dhe parashikojnë të mbështesin ekonomitë e tyre edhe në të ardhmen, ndërkohë qeveria shqiptare JO! Nuk do disbursojë asnjë qindarkë.
Ky nuk është buxheti i performancës pozitive, pasi do vazhdojë të japë qindra milionë euro për të financuar sistemin e dështuar dhe të korruptuar energjetik, ku gjatë vitit aktual dhe vitit të ardhshëm janë dhënë dhe do të jepen 300 milionë euro nga paratë tona të taksave për të financuar gjoja nevojat energjetike, ndërkohë që të gjithë e dimë se koorporatat energjetike janë kthyer në vatra punësimesh elektorale dhe shpërdorimesh me lukse nga më të ndryshmet.
Nuk do të jetë buxheti i profesionistëve të lirë, të cilët me mund e djersë kanë ngritur të ardhmen e tyre, tashmë do përballen me taksimin e ri qeveritar, duke u zhvatur paratë nga xhepat e tyre.
Nuk është buxheti i prodhuesve të vegjël dhe të mesëm, të cilët do përballen me rritjen e ndjeshme të niveleve të akcizës.
Po natyrshëm ju lind pyetja, i kujt qenka ky projektbuxhet?
Fatkeqësisht ashtu si buxheti i vitit aktual, edhe buxheti i vitit të ardhshëm do të jetë buxheti i oligarkëve, i financimit të PPP-ve.
Plot 116 milionë euro për 10 kontratat PPP do të jepen gjatë vitit të ardhshëm. Këto 10 kontrata PPP do të marrin tre herë më shumë fonde se ç’marrin 65 mijë familje me ndihmë ekonomike gjatë gjithë 2023.
Do të jetë buxheti i shpërdorimit me shpenzimet operative të qeverisë për rehatllik, ku fondet do të rriten edhe më tej me 15 milionë euro.
Këto të dashur qytetarë janë të vërtetat e hidhura të buxhetit të vitit të ardhshëm.
Janë të vërteta që askush, as vetë qeveria nuk i mohon dot, por thjesht me propagandë mundohet t’i fshehë ato.
Ndaj hapni sytë dhe veshët, ndërgjegjësohuni, bëhet fjalë për paratë tuaja, mos lejoni askënd t’i vjedhë e shpërdorojë ato.
