Ambasadorja e Shteteve të Bashkuara të Amerikës, Yuri Kim ka dhënë detaje nga takimi që zhvilloi me gjyqtarët e Gjykatës së Posaçme të Apelit kundër Korrupsionit dhe Krimit të Organizuar..
Më anë të një njoftimi nga ambasada amerikane, diplomatja ka dhënë mesazhin se gjyqtarët e prokurorët shqiptarë duhet ta bëjnë punën me ndershmëri, duke zbatuar pa mëdyshje ligjin, me guxim dhe krenari.
“Ambasadorja Kim u takua sot me gjyqtarët e Gjykatës së Posaçme të Apelit kundër Korrupsionit dhe Krimit të Organizuar. Ajo i falënderoi ata për punën e tyre të madhe dhe tha:Nuk mund të theksojmë mjaftueshëm rëndësinë e një gjyqësori të drejtë, të paanshëm dhe të guximshëm, jo vetëm për popullin shqiptar, por edhe për miqtë dhe aleatët e tyre. Shqipëria po ecën përpara, jo pa vështirësi, por megjithatë po ecën. Rruga përpara, është e vetmja rrugë për të moshuarit shqiptarë, të cilët nuk hoqën kurrë dorë nga shpresa dhe për djemtë dhe vajzat e reja, të cilët kanë aq shumë nevojë për të. E nxis çdo gjyqtar dhe prokuror të këtij vendi që ta bëjë punën e tij me ndershmëri, duke zbatuar pa mëdyshje ligjin, me guxim dhe krenari. Ne do të qëndrojmë krah jush, do të vazhdojmë të luftojmë bashkë me ju”, thuhet në njoftimin e ambasadës.
Ky është takimi i dytë që Kim zhvillon në ambientet e GJKKOS, pasi dy ditë më para zhvilloi një takim me Irena Gjoka dhe gjyqtarë të tjerë të Shkallës së Parë.
