Janë liruar nga burgu 2 autorët e grabitjes së supermarketit në Sarandë, ngjarje e ndodhur vitin e kaluar.
Mësohet se Gjykata e Sarandës ka ndryshuar masën e sigurisë, për Edmond Duzhën dhe Bektash Cukallën, të cilët do të qëndrojnë në arrest shtëpie, për shkak se ndaj tyre kanë përfunduar afatet e paraburgimit.
Ata u arrestuan në datën 29 dhjetor të vitit 2021 në Sarandë.
Burime bëjnë të ditur se prokuroria nuk arriti të sigurojë aktekspertimet kompjuterike, ndaj kërkoi në muajin qershor shtyrje të hetimeve me 3 muaj.
Kërkesa u pranua në atë kohë nga gjykata, por as gjatë tre muajve të tjerë, prokuroria nuk ka arritur të provojë akuzën ndaj dy të dyshuarëve.
Në muajin shtator të këtij viti, Prokuroria kërkoi shtyrje dhe me 3 muaj të tjerë afatin e hetimeve për dy të arrestuarit. Por ligji lejon vetëm një herë shtyrje të afatit.
Për këtë arsye, pas përfundimit 9 mujor të paraburgimit, gjykata duke vlerësuar rrethanat e ngjarjes, dy të akuzuarit për grabitjen e bujshme janë lënë në masën e sigurisë arrest në shtëpi.
