Ish-kryeministri Sali Berisha njoftoi ditën e sotme se PD do të hapë garën primare ëpr kandidatët për kryebashkiakë si dhe do të miratojë modalitetin për votimin e simpatizantëve.
Berisha deklaroi se të gjithë janë të lirë të paraqesin vullnetin e tyre për të kandiduar, ndërsa shtoi se ky është një hap i rëndësishëm për demokracinë e vendit.
“Jemi mbledhur për miratimin e modalitetit që ka të bëjë me pjesëmarrjen e simpatizantëve në zgjedhjet vendore 2023. Dhe hapjen e garës primare për pushtetin vendor në të gjitha degët e Partisë Demokratike. Mbledhja është e një rëndësie të veçantë. Ne vazhdojmë me përpjekjen tonë për një transformim të jetës së Partisë Demokratike në një forcë politike më demokratike, më të hapur. Që vendimmarrjen kryesore ia beson kryesisë dhe simpatizantëve të saj të cilët kanë investim të madh në këtë parti.
Do të jenë ata që do përcaktojnë qytetarët e parë dhe këshilltarët e tyre parlamentarë dhe lokalë. Mendoj se kjo risi është një kontribut thelbësor i opozitës shqiptare në demokracinë e këtij vendi. Veçanërisht zbatimi i kësaj praktike merr një rëndësi të veçantë po të kemi parasysh qëndrimin anti demokratik që mbahet edhe është mbajtur vitet e fundit ndaj votës së qytetarëve e cila faktikisht është pothuajse e përjashtuar tërësisht.
Ka kaluar në formalitet. Në diktaturë ne votonim çdo katër vite por e merrnin në dorë patronazhistët. Beteja për votën e opozitës shqiptate është për idealet më të larta demokratike për të vendosur në themel të shtetit ligjor vullnetin e lirë të qytetarëve shqiptarë. Udhëzuesi ka edhe datat për veprime konkrete. Janë zhvilluar dhe do të zhvillohen takime me aleatët për të gjetur gjuhën e përbashkët. Kanë sugjerime të drejta. Theksoj se mirëpriten të gjitha sugjerimet e tyre dhe kandidaturat e tyre.
Mirëpriten në mënyrë të padiskutueshme kandidatura nga shoqëria civile dhe bota akademike e vendit. Hapim një garë të paparë ndonjëherë në historinë e këtij vendi. Duhet të bëjmë gjithçka për suksesin e kësaj gare. Ekzistojnë kushtet dhe mundësinë për një proces dinjitoz dhe transparent”, tha Berisha.
