Një aeroplan ushtarak i Kremlinit është përplasur në një ndërtesë banimi të lartë në Rusi, duke shkaktuar një shpërthim të madh, i cili vrau të paktën tre persona.
Bombarduesi “Sukhoi Su-34” i prodhuar nga Rusia ishte në një fluturim stërvitor kur pësoi problem në ajër dhe përfundoi duke u përplasur me bllokun e banesave në Yeysk, një qytet turistik në rajonin Krasnodar, rreth orës 18:30 me orën lokale.
Avioni mori flakë pak pas ngritjes nga pista dhe të dy anëtarët e ekuipazhit u hodhën disa momente përpara se të ndodhte tragjedia.
Një imazh i jashtëzakonshëm i postuar në mediat sociale tregoi parashutën e njërit prej pilotëve duke u lëshuar drejt tokës, e ndriçuar nga flakët, përpara vendit të përplasjes.
Katër kate të ndërtesës ishin ende në flakë për orë të tëra pas aksidentit, duke shkrumbuar një sipërfaqe prej 2000 metrash katrorë në bllokun e apartamenteve.
Gazeta ruse Zvezdanews konfirmoi se zjarri u shua përfundimisht me ndihmën e 410 zjarrfikësve dhe personelit të shërbimeve emergjente.
Nuk është e qartë se sa viktima ka pasur, por raportet e hershme nga gazeta ruse Baza sugjerojnë se të paktën tre persona u vranë dhe 19 persona, përfshirë disa fëmijë u shtruan në spital, katër prej të cilëve thuhet se janë në gjendje kritike.
Guvernatori rajonal i Krasnodarit konfirmoi përmes kanalit të tij Telegram se ishte në vendin e ngjarjes, por nuk kishte asnjë informacion të menjëhershëm për viktima.
“Presidenti Vladimir Putin u informua për zjarrin dhe urdhëroi të jepet e gjithë ndihma e nevojshme për viktimat nga incidenti i avionit ushtarak“, tha Kremlini për agjencinë shtetërore të lajmeve TASS.
