Deputeti i Partisë Demokratike, Agron Gjekmarkaj thotë se emri i Gazmentit Bardhit u zgjodh në mbledhjen e Grupit Parlamentar të kësaj force politike, për të negociuar me pjesën tjetër në PD, pasi njeh proceset teknike që mund të çojnë drejt bashkimit.
Në një intervistë për Euronews Albania, Gjekmarkaj nënvizoi se në Grupin Parlamentar ka një vullnet pozitiv për bashkimin e PD-së.
“Ne kemi bërë një mbledhje të gjatë grupi dhe ka prevaluar emri i zotit Bardhi. Ka qenë dhe është zyrtarisht Sekretari i Përgjithshëm, e njeh jetën e Partisë Demokratike, njeh teknikalitetet sesi mund të ofrohen zgjidhjet, përveç zgjidhjeve politike, në një proces teknik bashkëpunimi ndërmjet palëve për të shkuar me një kandidat të përbashkët. Kam parë që ka një vullnet pozitiv të grupit”, tha ai.
Më herët gjatë ditës së sotme, kryetari i Partisë Demokratike, Sali Berisha zhvilloi një takim në seli, me Drejtuesit e Grupeve të Punës të cilët drejtojnë dhe ndjekin në bazë aksionin politik të kësaj force politike.
Në mbledhje është analizuar situata në terren, mbi organizimin e degëve, plotësimin e strukturave dhe anëtarësimet e reja.
Berisha ka theksuar se aksioni politik do të shtrihet njëkohësisht në dy drejtime; Organizimin e primareve dhe organizimin e protestave.
