Kryetari i partisë Demokratike, Sali Berisha në një deklaratë për mediat ka bërë me dije se shumë shpejt do të ketë protesta të fuqishme.
Sali Berisha ka akuzuar sërish kryeministrin Edi Rama për atë që ai e quan “afera e inceneratorëve”. Ai u shpreh se përgjegjës për aferën e djegësve janë vetëm dy Edi Rama dhe Agaçi.
“Shumë shpejt do ju prijmë protestave të fuqishme nuk mundet kush të tallet me mundin e djersën e qytetarëve shqiptarë. Ajo që ndodhi me Agaçin ishte një parodi tallëse me qytetarët shqiptar. Denoncoj publikisht për këtë dhe ju them shqiptarëve se përgjegjës për aferën e djegësve janë vetëm dy Edi Rama dhe Agaçi, Agaçi dhe Edi Rama që firmos për xhepat e tij fap fap fap dhe paf paf paf.
Agaçi dhe vetëm Agaçi mund të realizonte 17 procedura në 24 orë. Përveç tij një gjë të tillë mund ta bënte vetëm kryeministri dhe askush tjetër në administratë. Askush tjetër nuk ka fuqinë ekzekutive për të urdhëruar të gjitha agjensitë që me emergjencë brenda 24 orëve të dorëzojnë 17 akte për procesin e kontraktimit të një kompanie që nuk plotësonte asnjë kusht. Ëngjëll Agaçi dhe Edi Rama janë fajtorët më kryesorë sepse firmosën disbursimin e shumave shumëmilionëshe. Kujt? Një kompanie që sapo ishte krijuar dhe nuk plotësonte asnjë kriter ligjor si e tillë për t’ju besuar ndërtimi i inceneratorëve.
Qytetarët po presin të ngrihen dhe ne shumë shpejt do u prijmë protestave të ndryshme. Nuk mundet kush më të tallet me mundin dhe djersën e qytetarëve shqiptarë”-tha Berisha.
