Putin do të vendosë 9,000 trupa ruse në Bjellorusi, ndërsa aleatët e Kremlinit nxisin frikën për një sulm të ri tokësor në kryeqytetin ukrainas duke mbyllur ambasadat e tyre në Kiev
Përplasja e mundshme midis Perëndimit dhe Rusisë sa vjen e bëhet një fakt i pamohueshëm, teksa Vladimir Putin vazhdon lojërat e tij ogurzeza në Ukrainë dhe gjetkë, duke fortifikuar me avionë luftarak bërthamorë bazat në kufi me Finlandën dhe Norvegjinë.
Së fundmi, lideri i Kremlinit ka vendosur të stacionojë edhe 9,000 ushtarë në Bjellorusi, duke shkaktuar frikë se një sulm i ri tokësor në Kiev ose një vend të NATO-s mund të jetë i afërt.
Edhe pse Kremlini ka pretenduar se masa është pjesë e një operacioni mbrojtës, disa komentues besojnë se Putini po përpiqet të tërheqë Bjellorusinë në luftën e tij.
Ministria ruse e mbrojtjes deklaroi se vendimi për të dërguar ushtarë në Bjellorusi, për herë të parë që nga marsi, ishte ‘diktuar nga aktiviteti i vazhdueshëm në zonat kufitare’.
Kjo vjen pasi të shtunën, Ministria e Jashtme ruse kërcënoi se do të pajisë avionët luftarakë bjellorusë Su-25 me aftësinë për të transportuar raketa me aftësi bërthamore. Ndërkaq, Bjellorusia dhe Rusia thuhet se filluan të kombinojnë disa nga forcat e tyre ushtarake menjëherë pas shpërthimit në Urën e Kerçit.
Kufiri i Bjellorusisë, i cili shtrihet 140 milje nga Kievi, u përdor si pikënisje për pushtimin e Ukrainës nga Putini në shkurt.
Me një ushtri prej afërsisht 50,000 trupa, Bjellorusia aktualisht nuk ka asnjë raketë bërthamore të sajën dhe nuk konsiderohet si një forcë ushtarake efektive nga ekspertët e mbrojtjes.
Diktatori Alexander Lukashenko njoftoi në fillim të kësaj jave se do të vendoste një ‘task-forcë të përbashkët ushtarake’ me Moskën, një lëvizje që Minsku gjithashtu pretendon se është thjesht mbrojtëse.
Testi i gatishmërisë luftarake, i urdhëruar nga Lukashenko, u njoftua pasi kreu i shërbimit të tij sekret tha se priste të shihte një pikë kthese në pushtimin e Vladimir Putin në muajt e ardhshëm.
