Ervin Karamuço, i njohur si eksperti i Kriminalistikës shpesh herë ndan mendimet e tij mbi ngjarjet kriminale në vend me ndjekësit e tij në Facebook, por ditën e sotme ka zgjedhur të tregojë një të papritur që i ka ndodhur.
Profesori shkruan se si ka marrë mesazh nga një ish-student, i cili i tregon se leksionet e përftuara në universitet prej shpjegimeve të tij, i kishte përdorur për të nisur një profesion të ri, shumë larg rrugës së dijes.
Studenti që i shkruan Karamuços ishte shndërruar në një grabitës të famshëm vilash në Greqi.
Ai i shpjegon Karamuços se si policia greke u mahnit pas teknikave të fshehjes së gjurmëve që i kishte përdorur gjatë grabitjes dhe rrëfen se ka kryer dënimin në burgun e Patrës pas arrestimit.
“Profesor ti më ke përgatitur për jurist, por unë leksionet e tua i shfrytëzova për të qenë hajdut i suksesshëm në Greqi. Këtë më tha dje një ish studenti im, i cili sapo kishte dalë nga Burgu i Patrës dhe ishte deportuar për në Shqipëri. Fillova me tre të tjerë të grabitja vila tha. Nuk vishja dorashka ngaqë na kishe thënë se ato kur i heq mbajnë ende profile gjurmësh. Ndaj përdora një metodë tjetër. Lyeja gishtat me ngjitës “attack” dhe maskoja profilet papilare. I habita ca kohë ata policisë greke, sepse në kamera më shikonin pa dorashka, por në vendngjarje nuk gjenin asnjë gjurmë. U arrestuan mbas 6 muajsh. U zbuluam nga një pakujdesi në shitjen e orendive të vjedhura. Vuajta dënimin dhe tani jam në Tiranë. Për disa çaste më ngjau vetja bashkëfajtor, ula kokën e përshëndeta dhe u largova”, shkruan Karamuço.
